Upat ang nakagawas sa GCTA
Di lang diay tulo kon dili upat ka binilanggo nga nakonbikto sa Chiong case sa Sugbo ang gipagawas ni Nicanor Faeldon, ang gitaktak nga pangu sa Bureau of Corrections (BuCor), gikan sa New Bilibid Prisons (NBP) sa Muntinlupa sa niaging buwan tungod sa Good Conduct Time Allowance (GCTA) Law.
Mao ni ang pasiuna nakong nahibaw-an human sa dinali-dali nga pagsubay pipila pa lang ka pahina sa taas nga listahan sa 2,160 ka binilanggo nga gipagawas sa BuCor sukad sa 2013 hangtod sa pag-ulbo sa kontrobersiya sa GCTA sa niaging buwan.
* * *
Gawas nga wa sila magkadungan, ang aktuwal nga petsa sa paggawas lahi sa ilang release order nga gi-petsahan og Agosto 20, 2019. Ang upat ka binilanggo sa Chiong case nga naapil sa lista:
• Josman Fornolles Aznar (Prisoner Number N99P-1533) nga gipagawas niadtong Agosto 16, 2019;
• James Anthony Sato Uy (Prisoner Number N99P-1535) nga gipagawas dungan ni Aznar niadtong Agosto 16, 2019;
• Alberto Villamero Caño (Prisoner Number N99P-1537) nga gipagawas niadtong Agosto 19, 2019; ug
• Ariel Misa Balansag (Prisoner Number N99P-1538) nga gipagawas dungan ni Caño niadtong Agosto 19, 2019.
* * *
Sa 2,160 ka nakonbikto sa bangis nga krimen nga nakagawas tungod sa GCTA, mayoriya (1,714 o 79.35%) ang gipalingkawas sa mga tagduma sa BuCor nga tinudlo ni Presidente Rodrigo Duterte nga naglakip nilang Senador Bato dela Rosa, Heneral Benjamin Delos Santos, ug Faeldon.
Niay numero nga makapasuko ni Presidente Duterte: Gipagawas sa iyang mga tinudlo ang 156 nga nakonbikto sa ilegal nga drugas. Ubang nakagawas nakonbikto sa murder (748), rape (745), kidnapping (32), parricide (23), arson (6) ug bribery (2).
* * *
Sama sa ubang mga sulti ni Presidente Duterte, makalibog ang iyang pasidaan sa niaging gabii batok sa mga nakonbikto sa bangis nga mga krimen nga nakagawas sa NBP tungod sa GCTA:
• Ipabilanggo ba niya sila og balik?; o
• Igo lang giawhag sa pagtahan sa labing duol nga presinto sa kapolisan o detachment sa militar aron nga magpalista ug magpahibawo sa ilang nahimutangan aron nga mapatawag dayon sa mga imbestigasyon sa posibleng kasaypanan sa pag-ihap sa tukmang iban sa ilang sentensiya ug sa gidudahan nga pangurakot sa pagpahimus sa mga benepisyo sa GCTA?
- Latest
