Mangandam o magpa-undayon?
Kapin sa dekada ang nilabay gipasidan-an ang mga Sugbuanon sa dakong kahigayonan nga lamyon ang dakong bahin sa isla kon di mabadlong ang paspas nga paglapad sa kadagatan. Gihulagway ang Sugbo nga mao’y ikaduha nga labing mameligro sa tibuok Central Visayas kon mosaka ang dagat og usa ka metro. Sunod sa Bohol.
Ug ang gipasidan-an nga labing mameligro nga bahin sa Sugbo mao ang isla sa Mactan. Pipila gani ka eksperto nitumbok g’yud og tuig nga mahimong moabot na ang katalagman: 2020. O upat nga buwan na lang gikan karon.
***
Kining pasidaan mao ang nakapabugnaw sa labing dagko nga magpapatigayon sa Sugbo ug sa nasud sa pagbubo sa ilang puhonan sa Mactan. Nagpinuhalay sila sa pagtukod og mga patigayon sa mainland sa Sugbo. Apan wa mangahas pagtandog sa Mactan.
Sa pagligid sa katuigan nagpabilin nga naglutaw ang Mactan. Ang mga nahinayak na pagpahimutang sa isla nipalambo pa sa ilang mga patigayon. Labing klaro nga timaan nga way nahadlok nga malumos ang Mactan mao nga naapsan na sa Lapu-Lapu City ang silingan nga Mandaue City sa padaghanay sa mga molupyo.
***
Mao ni hinungdan nga bisan sa nagkadako nga hulga sa global warming gisalikway sa mga magpapatigayon ang tanan nilang panagana ug nikuyog sa layat pagpuno sa tanang nahibilin nga bakante nga mga luna sa Mactan.
Karong bag-o nisagol sa bahug-bahog ang mga langyaw labi nang taga mainland China. Nisulbong pag-ayo ang presyo sa mga luna nga nabalaka ang Pilipinhon nga mga negosyante nga way bag-ong Lapu-Lapu nga makabaraw sa mga langyaw pagpanghawod sa Mactan.
***
Nasayop ba ang mga eksperto? O nalangay lang ang ilang gikahadlokan? Angay ba g’yud ta nga managang sa climate change? O magpa-undayon sa sukwahi nga mga pasalig nga ang planeta mo-alim sa iyang kaugalingon? O gahi lang g’yud ta og bagulbagol?
Samtang nipalit na ang Maldives og luna sa Sri Lanka nga ilang kabalhinan sa di pa ma-unlod ang ilang nasud ug samtang magtukod na ang Indonesia og bag-o nga ulohan puli sa hapit na malapawi sa dagat nga dakbayan sa Jakarta, magpapating ba gihapon ta og pa-goryo-goryo sa abunda nga mga pagtulon-an sa nangagi nga mga katalagman ug magpadayon sa pakig-indig sa kinaiyahan?
- Latest
