Bahaw nga mga sulbad

Atol sa gitakda nga laing traffic summit sa mga dakbayan ug kalungsoran sa Metro Cebu sunod buwan gikabalak-an nga banhawon na sab ang bun-og ug karaan na kaayo nga mga sugyot sa pagsulbad sa kahuot sa atong kadalanan. Bisan napamatud-an na sa makadaghan uyamot nga higayon nga pakyas sa pagpahapsay sa trapiko, gipaabot nga ipamugos lang gihapon ang mosunod:

• Paghigpit sa pagdisiplina sa abusado nga mga motorista;

• Pagpalambo sa katakos sa traffic enforcers ug paghimo nila nga deputized agents sa Land Transporation Office (LTO); ug

• Pagtaod og modernong traffic system.

* * *

Di ko moingon nga way kapuslanan ang mga sugyot sa ibabaw. Apan angay natong angkunon ang pait nga kamatuoran nga bisan gihimo na sila sa nangagi nga mga pamunoan nagpabilin nga nagkamang, nisamot pa gani hinuon, ang trapiko.

Tingali di na sila paigo. Tingali kinahanglan na nga mohimo og dugang ug bag-o nga mga lakang ang mga tagduma sa trapiko. Tingali panahon na nga ang manambong sa traffic summit sunod buwan mo-atubang sa pait nga kamatuoran: Ang naghinobrang gidaghanon sa atong mga sakyanan bisan unsaon pa og maniobra niawas na sa kadalanan.

* * *

Wa magkuwang ang LTO sa pagpahibawo sa matag tuig sa makapa-alarma nga pagsulbong sa gidaghanon sa narehisto nilang mga sakyanan. Wa kabaraw sa adlaw-adlaw nga pagpangompra og gatosan ka sakyanan sa Sugbo ug ubang bahin sa nasud ang dugang excise tax sa mga sakyanan ubos sa TRAIN Law sugod karong tuiga.

Apan way nagtagad sa pagtakdo sa mga numero sa LTO sa nahibiling mga luna sa kadalanan. Ambot unsa na ta kaandam sa paglaslas sa gidaghanon sa mga sakyanan nga makagamit sa kadalanan.

* * *

Abunda ang kasinatian sa kanasuran nga niiban sa mga sakyanan kay niabot na sa kinutoban ang pagpalapad sa kadalanan. Pananglitan ang Singapore nga ang gidak-on sikapito (1/7) ra sa Sugbo malampusong nipatuman sa:

• Vehicle quota system (VQS) o pagsubasta sa kahigayonan pagpanag-iya og bag-ong mga sakyanan;

• Revised Off-Peak Car (ROPC) o paghatag og insentibo sa mga tag-iya bugti sa di pagpadagan sa ilang sakyanan sa gitakdang mga oras sa adlaw ug mga adlaw sa semana; ug

• Congestion fees sa mga sakyanang mosud sa kinapusoran sa dakbayan atol sa peak hours.