Samtang nangandam ang dyAB Abante Pa, Bisaya! sa laing hugna sa Grand Halad sa Kapamilya naaghat mi sa pagsubay sa sinugdanan sa gitawag na namo karon nga kinadak-an nga piyesta sa libre nga mga pangalagad sa Sugbo ug Central Visayas.
Among itubag ni bisan kinsa nga mangutana nga ang labing una nga Halad sa Kapamilya (ang “Grand” amo na lang gipuno human sa pila ka tuig dihang nidaghan na pag-ayo ang mga pangalagad) gipahigayon niadtong Nobyembre 6, 2005, uwanon nga adlawng Dominggo, sa makasaysayanon nga Plaza Independencia sa Dakbayan sa Sugbo.
* * *
Apan ang wa mahibaw-i sa kadaghanan mao nga ang tinuod nga nakahatag namo og ideya sa paghimo nga piyesta sa libre nga mga pangalagad mao si Fidel Magno, pangu sa Department of Manpower Development and Placement (DMDP) sa Cebu City government.
Si Fidel ang nagpasabot namo sa kaayuhan sa pag-abot sa nagkalainlain nga mga buhatan sa gobyerno aron pag-alagad sa mga Pilipinhon nga nagtrabaho sa langyawng kabaybayonan atol sa Migrant Workers Day sa Plaza Independencia niadtong Hunyo 2005. Sa nisunod nga lima ka buwan nangahas mi pagpangandam pagsubli sa kalihokan.
* * *
Nakapadako sa Grand Halad ang pagtinabangay sa mga buhatan sa gobyerno ug pribadong mga kompaniya. Labing mahinungdanon namong nakat-onan nga may milagrong mahitabo kon mag-abot ang mga may kasingkasing sa pagtabang.
Sugod sa 2006 duha ang Grand Halad sa matag tuig: Matag Hunyo pagtimaan sa anibersaryo sa pagsibya sa dyAB; ug matag Nobyembre pagtimaan sa sumad sa labing unang Halad. Ang Grand Halad ugma sa Main Campus sa Cebu Technological University (CTU) mao na ang ika-26.
* * *
Nasubo ko nga nagsuwat ini kay akong nahibaw-an nga tangtangon na sab si Fidel sa DMDP inig banos sa bag-ong pamunoan sa City Hall sunod semana. Ilabay na sab siya og laing katungdanan sama sa nahitabo dihang nag-away na silang Mayor Tommy Osmeña ug kanhi mayor Mike Rama.
Di kami ra ang nawili ni Fidel. Ang mga buhatan sa gobyerno ug pribadong mga kompaniya nga nakasinati sa kamatinud-anon sa iyang job fairs ug livelihood programs gi-anugnan sab sa iyang pagkawa sa DMDP. Bugtong konsuylo mao nga mahimong makaginhawa og luag si Fidel kay mogaan nang iyang trabaho.