Usa sa mga barangay kapitan sa bukiran sa Dakbayan sa Sugbo kansang panimay girakrakan sa armadong mga tawo sa niaging semana nikumpisal nga gitanyagan siya og dakong kuwarta aron pagbudhi sa Bando Osmena Pundok Kauswagan (BOPK) sa piniliay sa Association of Barangay Councils (ABC) sa niaging tuig.
Matod ni Barangay Kapitan Aurelio Laspuna sa Sinsin gihatagan siya og kuwarta di lang kausa kon dili kaduha gyod aron mobotar ni Nina Mabatid sa Barug Team Rama inay ni Franklyn Ong sa BOPK. Apan gisalikway niyang mga tanyag ug nagpabilin sa administrasyon.
* * *
Nisibaw ang mga huhungihong nga nagbaha ang kuwarta apan ang mga kapitan nga akong nahinabi kutob ra sa pasumbingay. Si Laspuna ang unang ni-detalye sa tanyag:
Unang nitunol niya og tseke nga 11,000 Singaporean dollars (P423,000) si kanhi ABC President Jingjing Faelnar, kinsa dihang iyang giingnan nga BOPK gyod siya niawhag nga tipigan lang ang tseke kay may dugang kuwarta pa nga mosunod; ug
Dayong piniliay niadtong Hulyo 30 sa niaging tuig, laing representante ni Mabatid giingon ni Laspuna nga nihatod og P500,000 sa iyang panimay.
* * *
Matod ni Laspuna gipasa niya ang representante ni Mabatid sa bay ni Barangay Kapitan Prescillo Albores sa Sudlon II, kinsa nitud sab sa representante ngadto ni Barangay Kapitan Nerio Pador sa Tabunan. Kansang asawa maoy nidawat kay wa man maabti sa bay ang kapitan, ug busa si Pador nay naproblema sa pag-uli sa kuwarta.
Nitug-an si Laspuna sa Arangkada sa DYAB Abante Pa, Bisaya! Nga ang tseke giuli niya sa buhatan sa iyang giila nga sekretarya ni Mabatid.
* * *
May mga kapitan sa BOPK nga nanungog nilang Laspuna, Albores ug Pador nga kon sila pa ang gihatagan sa kuwarta wa gyod unta nila balibari. Apan si Laspuna nipasabot nga mao gyoy iyang naandan sukad niadtong si Sonny Osmeña pay mayor sa Dakbayan sa Sugbo nga mopasilong gyod siya sa administrasyon.
Mao nga dihang si Alvin Garcia nay nagduma sa City Hall, iyang gibalibaran si Tommy Osmeña. Mao nga gibalibaran sab niya silang kanhi Mayor Mike Rama ug ubang niawhag niya pagbalitok. Wa kahibawo si Laspuna kon ang iyang baruganan may labot ba sa pagpangrakrak sa iyang bay.