Hinungdan sa kang-a
Gipanghimakak ni Kongresista Jonas Cortes sa ikaunom nga distrito sa Sugbo ang pasangil ni Mandaue City Mayor Luigi Quisumbing nga ilang gipahimuslan ang kamasakiton sa negosyanteng si Norberto Quisumbing, ang apohan sa mayor, aron nga mopaluyo sa kampanya ni Cortes sa pagbalik sa City Hall.
Matod ni Cortes si bisan kinsa nga nakaila ni NQ (angga sa apohan) di motuo nga kahulhogan ang iyang lantip nga panghunahuna. Nibutyag siya nga gidapit siya ni NQ og pamahaw ug gipahibawo nga mosuporta sa iyang kandidatura pagka mayor batok sa apo nga si Luigi.
* * *
Sa iyang bahin, si Mayor Quisumbing nipadayag og kaluoy sa iyang apohan, nga iyang gihulagway nga nagsud-gawas na sa tambalanan sa nangaging mga buwan apan inay hatagan og kahigayonan nga makabawi sa iyang kahimsog, gimaniobra sa pipila ka tawo nga nagpalibot.
Niingon ang mayor nga padayon niyang pasidunggan ang iyang apohan pinaagi sa pagbatok sa mga pangurakot ug ilegal nga drugas sa Mandaue. Niangkon si Quisumbing nga tungod sa mga intriga sa iyang mga kaatbang mahimo hinuon nga di manginlabot si NQ sa umaabot nga piniliay.
* * *
Apan si Cortes niinsistir nga hingpit ang pagpaluyo ni NQ niya ug sa tanang magpapili ubos sa Team Mandaue. Gani, gipahuwam na sila og mga multicab ug gi-aporan og mga motorsiklo alang sa ilang kampanya sa kabaranggayan.
Laing pagmatuod ni Cortes nga si NQ naa nila mao ang pagtugot sa ilang paggamit sa iyang gipanag-iya nga Norkis Park sa Mandaue aron lusaran sa ilang parada padung sa pagpasaka sa ilang mga kandidatura sa Comelec.
* * *
Kasaligang mga tinubdan nagbutyag nga nagsugod ang panagsungi sa apo ug apohan dihang gipakandadohan ni Mayor Quisumbing sa niaging tuig ang bay kahilayan sa iyang ig-agaw sa dan A.S. Fortuna nga gilambigit sa mga karambola. Labing nasuko ang iyaan sa mayor nga giisip nga labing sinaligan ni NQ human namatay ang iyang asawang si Britta niadtong 2013.
Gipanghimakak ni Mayor Quisumbing nga yanong panagsungi sa pamilya ang hinungdan. Nitug-an siya sa Arangkada sa dyAB Abante Pa, Bisaya! nga may mas seryuso nga kalapasan sa mga balaod nga nahimo ang iyang paryente nga mahimong mahibaw-an ra sa publiko sa umaabot nga mga adlaw.
- Latest
