Makaginhawa na og luag ang mga Sugbuanon, kay human sa pito ka buwan nga pagkatanggong inanay nang nasulbad ang nagbuntaog nga mananakod nga mga basura sa labing dagkong tambalanan sa Sugbo. Mao ni pasalig sa Pollution Abatement Systems Specialists Inc. (PASSI) nga maoy nibutyag sa nagkagrabeng krisis sa basura sa mga ospital.
Samtang wa pa katuman ang tanang tambalanan sa mga panginahanglan sa Environmental Management Bureau (EMB) aron makatugyan na sa ilang basura ngadto sa service providers, nahingpit nang mga dokumento sa labing dagkong tambalanan nga maoy tinubdan sa labing daghang basura.
***
Giila ni Irene Donoso, ang Pollution Control Officer (PCO) sa PASSI, ang mosunod nga mga tambalanan nga nakatuman na sa tanang panginahanglan sa EMB: Chong Hua Hospital sa Cebu City ug Mandaue City; University of Cebu Medical Center; St. Vincent General Hospital; Vicente Gullas Memorial Hospital; Sacred Heart Hospital; Dr. Ignacio M. Cortes General Hospital; LH Prime Medical Clinic; SuperCare Medical Services; ug Life and Health.
Padayong naghikay sa mga panginahanglan ang Vicente Sotto Memorial Medical Center (VSMMC) nga gipasaylo na sa kapakyas pagsumiter og Environmental Compliance Certificate (ECC) ug Cebu City Medical Center (CCMC) nga nagsubasta pa sa kontrata sa service provider.
***
Atol sa Arangkada sa DYAB Abante Pa, Bisaya!, subling nihangyo si Donoso sa EMB nga hatagan og lugway ang mga tambalanan nga nakasugod na paghikay sa mga dokumento apan wa nay kapahimutangan sa ilang basura nga madugangan sa matag adlaw nilang operasyon.
Apan gibalibaran siya ni Regional Executive Director Gilbert Gonzales sa Department of Environment and Natural Resources (DENR) sa Central Visayas kay mas lisod nang pagsubay sa mananakod nga mga basura kon makagawas na sa mga tambalanan.
***
Labing naglisod pagtuman sa mga panginahanglan sa EMB ang mga tambalanan nga wa pa sukad makasuway og subay sa mga lagda. Apil sa naigo sa pagka-istrikto na sa EMB karon mao ang mga ospital sa gobyerno nga napugos sa pagsugod sa uno.
Hinaot nga ang pagkapugwat sa tanang hingtungdan mosangpot sa mas luwas nang paghipos sa mananakod nga mga basura sa mga tambalanan. Ug hinaot nga mabawi pa ang lapad nga kahugaw nga namugna sa katuigan sa pagpabaya.