Nganong ni-abanteng habal-habal
Mao pa lang gani pagpasar sa balaudnon nga mag-legalisar sa habal-habal sa ikatulo ug kataposang pagbasa sa House of Representatives, nga pila pa lang ka semana ang nilabay way bisan usa nga nagtuo nga mahitabo, naglantaw na si Kongresista Raul del Mar kinsay mamahimo niyang alyado sa Senado.
Samtang daghan na uyamot nga susamang balaudnon ang napasaka sa nangaging mga Kongreso, way usa nga nakapasar sa mga komitiba. Apan tungod sa liderato ni Del Mar, gawas nga nakaabot sa plenaryo, naaprobahan pa g’yud nga way bisan usa nga nisupak.
***
Ang kahinog sa kasinatian ni Del Mar sa pagpanday og mga balaod nakapugong niya sa ahat nga pagsaulog. Nahibawo siya nga mahug nga way kapuslanan ang pagpasar sa ilang bersiyon bisan sa kaapiki sa kalendaryo sa House kon way samang balaudnon sa Senado.
Nakit-an dayon niya si Senate President Pro Tempore Ralph Recto. Nga samang Del Mar nipasaka og samang balaudnon pila pa lang ka adlaw ang nilabay. Isip ikaduhang labing taas nga opisyal sa Senado, si Recto samang Del Mar mao ang labing takos nga mo-apura sa mga senador.
***
Niangkon si Del Mar nga di siyay tinuod nga pangu sa kawsa. Gipasidunggan niya si Kongresista Red Durano sa ikalimang distrito sa Sugbo nga maoy nipasaka sa labing unang balaudnon kapin sa dekada nang nilabay.
Si Del Mar niangkon atol sa Arangkada sa dyAB Abante Pa, Bisaya! nga nadasig siya sa hingpit nga pagpaluyo ni Cebu City Mayor Tommy Osmeña sa dinaliang panginahanglan paghimong legal sa mga habal-habal sa Sugbo ug ubang bahin sa nasud.
***
Gipalili ming Del Mar sa sekreto sa malampuson niyang pagpangamahan sa dul-an gatos ka balaod: Matag kongresista nagduso og balaudnon, nga maka-irog lang kon tagdon sa mayoriya; maong nanghangyo siya uban ang pasalig nga suportahan sang iyang kaubanan.
Gawas sa gisaad nga suporta ni Del Mar, nakumbinser ang mga kongresista sa kamadanihon sa kawsa. Nga dayong pasar, nidaghan ang nalistang tigpasiugda, apil na si House Speaker Gloria Macapagal Arroyo. Mo-adjourn nang Kongreso karong gabii, apan naglantaw nang daan si Del Mar sa tulo ka semana nilang sesyon human sa piniliay sa Mayo 23 pagkumbinser ni Recto ug ubang mga senador.
- Latest
