Nakatsamba og tinuod nga pista
Sa nangaging daghan nga uyamot nga mga Pista Senyor, nagsige ko og pangita og kabalayan sa Dakbayan sa Sugbo nga tinuod g’yung mag-pista nga maghikay ug mohangop og mga bisita uban ang panghinaot nga maapil ko sa padayunon sa ilang pinuy-anan.
Apan tungod sa kalinga sa live coverages sa akong gialagaran nga mga sibyaanan sud na sa kapin sa tulo ka dekada, bisan gidungog nga daghang maghikay sa Pasil (nga kanhi nako pinuy-anan) ug R.R. Landon (nga pila ra ka lakang gikan sa Sinulog Grand Stage), wa matuman ang pangandoy.
* * *
Mao nga dihang may kakulian sa panglawas ang usa ka sakop sa among pamilya ug gitugotan kong mopalta sa among naandan nga gimbuhaton sa paghulagway sa parada, kabahin nako nahinangop sa kahigayonan nga makapa-miyesta na g’yud og tinuod.
Apan layo ra kaayo ang among nahimutangan nga tambalanan gikan sa kinapusoran sa dakbayan. Di kong kalighot pag-adto sa Pasil o R.R. Landon kay labihan kahuot sa tanang sidewalk ug kadalanan. Gidasig hinuon nako ang pasyente nga motilaw mi sa labing lamian nga mga pagkaon duol sa mga agianan sa parada.
* * *
Alang sa pamahaw, nanugon ang pasyente og linung-ag nga mga itlog sa manok ug init nga kan-on. Kay wa man ko masuhito sa mga kan-anan nga mangabli og sayong buntag sa adlaw sa piyesta, nakaabot ko duol sa eskina sa Gen. Maxilom Avenue una nakapalit sa mga gitugon.
Sa paniudto, nangayo ang pasyente sa iyang mga kinaham sa kan-anan duol sa Fuente. Labihang huota na sa mga agianan ug maoy pagbunok sa uwan apan nakuha nako ang lamiang mga putahe.
* * *
Mas naproblema ko sa panihapon. Kay di man himsog ang mga pagkaon sa kadalanan, giingnan ko sa pasyente nga mangita na lang og akong ganahang pagkaon kay ang putahe sa ospital ang iyang kan-on.
Apan ganahan kong makaambit siya og pagkaon sa piyesta nga di mameligro ang panglawas. Labihang lipaya nako pagkakita og kan-anan sa inasal nga manok sa Bacolod. Ug nahimamat ang tibuok pamilya, tapad sa kan-anan, nga tinuod g’yung nag-piyesta. Gihukaran ko nila sa tanang putahe ug ilimnon. Natuman ang akong pangandoy. Ug gipabawonan pa og manok sa Bacolod para sa pasyente.
- Latest
