Pagbawi sa presyo sa lana
Sa ika-unom nga sunudsunod nga semana, nitibugsok ang presyo sa lana sa merkado sa kalibotan. Mahimong mosangpot ni sa lain na sang pag-us-os sa presyo sa lana dinhi sa ato kay ang presyo sa lana mas mubo og 6.5% kon itandi sa presyo sa lana sa niaging semana nga nisangpot sa kinadak-an nga us-os sa presyo sa krudo ug gasolina karong tuiga.
Nakabawi hinuon ang presyo sa lana sa kataposang duha ka adlaw sa patigayon sa niaging semana tungod sa plano sa Organization of Petroleum Exporting Countries (OPEC) paglaslas sa ilang produksiyon.
***
Ang labing apurado nga molaslas sa produksiyon aron nga mobalik og saka ang presyo sa lana mao ang Saudi Arabia, nga maoy hawod sa tanang sakop sa OPEC. Nisugyot siya nga laslasan ang kalibotanong produksiyon og 1.4 milyones ka baril matag adlaw aron nga di magsobra ang kalibotanong suplay.
Human sa pasiuna nilang tigom sa Abu Dhabi niadtong Dominggo, magtagbo pag-usab ang mga sakop sa OPEC sa Vienna karong Disyembre 7 aron sa pagpalig-on sa ilang kauyonan paglaslas sa produksiyon apil sa ubang kanasuran.
***
Nahimangod ang Saudi Arabia sa pagsugot ni US President Donald Trump nga makapadayon ang Iran sa pagbaligya og lana ngadto sa China, Japan, South Korea, ug laing lima ka nasud bisan sa pagbanhaw na sa pagdili sa oil exports.
Giisip sa Saudi nga pagbudhi ang gihimo sa mga Amerikanhon human sila niuyon sa awhag ni Trump sa pagpasulbong sa ilang produksiyon aron nga matapakan ang gipaabot nga dakong haw-ang sa kalibotanong suplay tungod sa silot batok sa Iran.
***
Ang labing dakong tunok sa pag-apura sa Saudi nga laslasan dayon ang kalibotanong produksiyon sa lana mao ang Russia, nga ilang kakonsabo sa pagpasaka pagbalik sa presyo sa lana hangtod sa niaging buwan. Gitataw sa kadagkoan sa Russia nga makiangayon ang presyo sa lana karon busa di moiban sa ilang produksiyon.
Laing babag sa paglaslas sa produksiyon mao ang Estados Unidos. Kansang shale oil companies nakatilaw na og ginansiya human sa katuigan nga alkanse sa pagpuga og lana gikan sa bato. Tungod sa bag-ong teknolohiya mas paspas ang mga Amerikanhon sa paglaslas o pagdugang sa ilang produksiyon agad sa merkado.
- Latest
