Napamatud-an nga bakak ang nikatap sa social media nga ang Dengvaxia, ang labing una ug bugtong bakuna batok sa dengue, gibaligya sa India og P9.40 (12 Indian Rupee) matag bakuna. Kay gipahibawo sa Sanofi Pasteur, tighimo sa Dengvaxia, nga wa pa sila mamaligya sa India ug gitataw sa gobyerno sa India nga wa pa mahuman ang clinical trials sa ilang nasud.
Apan, sama sa naandan, wa ning kapugong sa mga dumadapig ni Presidente Rodrigo Duterte pagpakatap sa sayop nga kasayuran. Gani, gihimo sa Volunteers Against Crime and Corruption (VACC) nga sukaranan sa ilang reklamo nga gipasusi dayon ni Justice Secretary Vitaliano Aguirre.
***
Nipasangil ang VACC nga overpriced ang P3.5 bilyones nga transaksiyon tali ni kanhi Health Secretary Janette Garin ug sa Sanofi: Tag-P1,000 ang tusok, o P3,000 ang tulo ka tusok, o kinatibuk-an nga P3 bilyones sa usa ka milyon ka pasyente.
Matod ni Health Secretary Francisco Duque III ang nahibilin nga P500 milyones mahimo nga gigahin sa gasto sa pagpamakuna. Samtang si Executive Director Julius Lecciones sa Philippine Children's Medical Center (PCMC), nga maoy nangompra sa Dengvaxia, niingon nga ang nahibilin nga pundo nagpabilin sa panudlanan sa DOH.
***
Mahimo nga tinuod ang pangangkon ni Garin nga nakakuha og dako nga diskuwento ang DOH sa Dengvaxia kay nitumaw nga mas barato ang bakuna sa Pilipinas kon itandi sa ubang kanasuran:
250 Singaporean dollars o P9,335 ang matag tusok sa Dengvaxia sa Singapore, o SG$750 (P28,000) ang tulo ka tusok;
2,930 Thai Baht o P4,534 ang matag tusok sa Dengvaxia sa Thailand, o THB8,790 (P13,604) ang tulo ka tusok;
900,000 Indonesian Rupiah o P3,351 ang matag tusok sa Dengvaxia sa Indonesia, o Rp2,700,000 (P9,537) ang tulo ka tusok;
138 Brazilian Real o P2,107 ang matag tusok sa Dengvaxia sa Brazil, o R$414 (P6,321) ang tulo ka tusok; ug
Mas maklaro ang diskuwento sa DOH kon itandi sa kamahal sa Dengvaxia sa pribado nga mga ospital ug klinika sa Pilipinas, P4,000 matag tusok o P12,000 ang tulo ka tusok.