Inihap ang mga adlaw

Kamong mga abusado nga motorista nga sagad magpataka lang pag-park sa inyong mga sakyanan daplin sa karsada, pagbantay lang kay inihap na ang inyong mga adlaw.

Gipahibalo ko ni Mayor Tomas Osmeña nga ang dakbayan sa Sugbo mamalit og daghang clamp aron gamiton pag-clamp sa mga sakyanan nga ipataka lang pag-park sa lainlaing mga karsada sa siyudad sa Sugbo.

Nalipay sab ang mayor diha nga akong gipahinumdoman nga angay na nga ang dakbayan mobanhaw sa towing operations, pinaagi sa pagguroy niadtong mga sakyanan nga ipataka pag-park ug makahasol sa mangagi nga sakyanan.

Karon nga majority na ang mga konsehal nga alyado sa Bando Osmeña-Pundok Kauswagan (BOPK) diha sa City Council, dili na maglisud si Mayor Osmeña sa pagpalabang sa tinguha nga ibalik ang towing operations.

Hinoon, sa among panagsulti ni Konsehal Joel Garganera, ang usa sa vocal kaayo nga sakop sa Team Rama, iya ko nga gipasaligan nga suportahan niya ang pag-clamp sa mga sakyanan basta tumanon lang ang mga lagda.

Angayan na g'yud nga ibalik ang towing operations kay miabuso na kaayo ang daghang motorista nga nagpataka lang pag-park sa ilang sakyanan daplin sa karsada, ug resulta, nakapasamot kini sa problema sa trapik.

Kon paspasan lang g'yud ang pag-clamp ug pag-towing sa mga sakyanan nga ipataka lang par-park sa mga "no stopping area" sigurado nga makatabang ni pagpahapsay sa atong trapiko.

Daghan ang wala'y kaikog nga sa ilang pag-park daplin sa karsada, makapahasol sila sa ubang motorista. Magpasalamat ko daan ni Mayor Osmeña kon ibalik na niya ang towing.

Sigurado ko nga adunay moreklamo niini, apan kadto ra nga mga tawo nga abusado ug wala'y uwaw nga mogamit sa karsada isip ilang parking area sa sakyanan. Diri lang duol sa Freeman sa V. Gullas Street, kadaghang sakyanan nga anaa ra sa daplin sa karsada gi-park.

Naa'y tindahan diha nga namaligya og mga itlog, ang ilang trak de karga anaa ra g'yud gi-park sa atubangan sa ilang tindahan. Gawas niana, daghan pa nga sakyanan nga angayang i-clamp aron katudloan og leksiyon ang mga tag-iya.

* * *

May basehanan baya ang reklamo nga ang Commission on Human Rights (CHR) kusog lang kaayo nga mangimbestigar kon ang mga polis ug militar mao'y gipasanginlan nga nangabuso, apan kiyugpos kaayo ang ilang mga bukton kon ang mga polis ug militar mao'y abusohan.

Kon makapatay gani ang militar ug kapolisan sa mga gituohang rebelde, ug ubang masinupakon sa balaod, unya moreklamo ang mga tagtungod ngadto sa CHR, ang mao nga ahensiya abtik kaayo nga mohimo og imbestigasyon, dayon ikiha nila ang mga hingtungdan.

Ngano nga dili man sila mohimo og imbestigasyon ug ikiha ang mga rebelde nga makapatay og mga tropa sa kagamhanan?

Kini mao'y rason nga si Presidente Duterte naghambin og kahiubos ngadto sa maong ahensiya, ug nagplano nga wad-on ang Commission on Human Rights. Apan kinahanglan pa nga ipausab ni Duterte ang Konstitusyon.

Apan kon matuman ang tinguha ni Duterte nga wad-on ang CHR, dili ba kaha moabuso ang kapolisan ug kasundalohan kay wala na may kasumbongan ang katawhan? Asa na man lang unya moreklamo ang katawhan kon sila abusohan sa mga polis ug militar?

[email protected].