Sigurado g'yud nga magkinto ang mga driver nga mosulod dinhi sa dakbayan sa Sugbo kon ang mga traffic enforcer sa siyudad tugotan na nga makasakmit og driver's license bisan og wala sila'y Temporary Operators' Permit (TOP).
Gitataw sa Cebu City Legal Office nga wala'y balaod nga malapas kon aprobahan ang gisugyot nga ordinansa nila ni Konsehal Margarita "Margot" Osmeña ug Konsehal Eugenio Gabuya Jr. nga hatagan og gahum ang mga traffic enforcer nga makasakmit og lisensya.
Gikatakda nga ang ordinansahon sa duha ka konsehal ipresentar na sa City Council karong sunod semana alang sa final deliberation, ug posible nga uyonan sa mga konsehal kay gitumong kini aron kadtong mga abusadong driver mahadlok na nga mohimo'g kalapasan.
Sulod sa dugay'ng katuigan, ang mga traffic enforcer dinhi sa dakbayan sa Sugbo, ug bisan na gani diha sa ubang mga siyudad ug kalungsoran, kataw-an lang sa mga driver kay dili man sila makasakmit sa lisensya, gawas kon sila deputized sa Land Transportation Office.
Tungod sa pagpadikidiki sa LTO nga dili na mo-deputize og mga traffic enforcer nga kaswal lang sa usa ka Local Government Unit (LGU), natawo sa huna-huna sa duha ka konsehal ang pagmugna og ordinansa nga magtugot sa mga traffic enforcer nga makasakmit og lisensya nga gamitan lang og Traffic Citation Ticket.
Ang makalahi niini kay kon TOP ang gamiton, ang multa nga ibayad sa mga madakpang driver, adto mahipunta sa panudlanan sa nasudnong kagamhanan. Apan kon ang pagdakop gamitan lang og TCT, ang multa adto mosulod sa panudlanan sa dakbayan sa Sugbo.
Nagpasabot nga kay makakolekta man g'yud og dakong multa ang dakbayan sa Sugbo kon padayong dili motuman sa balaod sa pagmaneho og sakyanan ang mga driver, ang siyudad makamugna na usab og daghang mga proyekto sama sa pagpanindot sa atong mga karsada.
Gawas pa, ang mga driver posible pa nga magtarong na pagmaneho sa ilang sakyanan aron dili madakpan. Bana-bana nako, kining maong ordinansa, sundugon kini sa ubang mga siyudad ug kalungsoran dinhi sa Sugbo.
Una nga gipatuman didto sa mga dapit nga sakop sa Metro Manila Development Authority (MMDA) nga ang mga traffic enforcer gitugotan nga makasakmit og lisensya sa mga masalaypong driver, bisan og ang traffic enforcer walay TOP.
***
Daghan ang nabalaka nga basin kuno og abusohan sa mga traffic enforcer ang gahum nga gihatag kanila. Para kanako, nganong mahadlok man kamo? Una, kadtong mga driver nga kusog kaayo mohimo'g kalapasan sa pagmaneho og sakyanan, mao ra g'yud ang angay'ng mahadlok niini.
Kamo nga mga buotang driver, dili ba diay kamo malipay nga pangdakpon ug multahan kanang mga driver sa PUJ ug taxi nga mogawas sa iyang "lane" unya sugaton ang mga nagdagan nga sakyanan kay gusto nga mouna?
Kon aprobahan na kining maong ordinansa, moapil na gani ko sa pagpanakop. Dili ko traffic enforcer sa CCTO, apan sakop ko sa Task Force Alpha nga gihangyo ni Mayor Tomas Osmeña nga motabang sa pagpahapsay sa trapiko dinhi sa dakbayan.
Kita nga mga buotang driver, dili kita mahadlok nga tugotan na ang mga traffic enforcer nga makasakmit og lisensya. Kon may moabuso nga traffic enforcer, i-report sa mayor aron kasilotan.