Pinangga si Lola sa City Hall

Nakamatikod ang mga awditor sa Commission on Audit (COA) nga mura’g gipaboran g’yud sa mga opisyal sa Cebu City Hall ang usa ka food catering service nga mao’y kanunay’ng makasuplay og pagkaon sa lainlaing kalihukan nga ilang pasiugdahan. Resulta, ang Lola Mary’s Catering mao’y naka-supply og pagkaon sa City Hall nga mokantidad og minilyon ka pesos.

Gawas sa Lola Mary’s Catering, ingon sa gipatuo nga adunay duha ka laing catering services nga misalmot sa public bidding nga gidumala sa Bids and Awards Committee, apan diha nga gisusi sa COA, wala g’yud nila matultuli ang Tawings Sizzlers ug ang TNT Caterer, base sa address nga ilang gihatag.

Wala sab masayod ang mga opisyal sa barangay didto sa dapit nga giingong nagbase ang duha ka catering services nga anaa kini nag-operate sa ilang dapit. Dili kay karon lang kini mahitabo nga atol sa pagpahigayon og public bidding, adunay mohimo og pamaagi aron ipakita nga may laing miapil sa subasta, apan posible nga hinimo-himo ra kay dili gani matultolan ang maong mga opisina, o kaha makontak ang tagdumala sa mga misalmot sa bidding.

Ang pagpamalit og minilyon ka pesos nga kantidad sa pagkaon gihimo atol sa administrasyon ni kanhi mayor Michael Rama, apan nabayran atol na sa termino ni Mayor Tomas Osmeña. Ang mga sakop sa Bid and Awards Committee (BAC) motan-aw g’yud unta nga ang misalmot sa bidding mga lehitimo g’yud nga kompaniya.

Nakabantay gani ang COA nga sagad sa mga pagkaon nga gisuplay sa Cebu City Hall gikan g’yud sa Lola Mary’s Catering. Makapaduda g’yud nga adunay mga opisyal sa City Hall nga may inpluwensiya sa BAC nga mao’y nagpasiugda niining maong kalaki.

Angay’ng ang mga sakop sa Bids and Awards Committee nga karon gisaligan ni Mayor Osmeña maglikay g’yud aron dili masundog ang nahitabo sa kanhi administrasyon.

* * *.

Uyon ra g’yud ko nga kadtong mga opisyal sa barangay nga ideklarar nga “drug-free” ipabilin lang sa puwesto kon mahitabo nga mauktaba ang barangay elections, unya ang kadagkoan sa kagamhanan motudlo na lang og bag-ong mga opisyal.  Apan lisud pa kaayo kini nga mahitabo kay gilatid man gud sa atong Konstitusyon nga ang mga opisyal sa barangay pilion g’yud sa katawhan. Aron matuman ang tinguha sa mga opisyal nga naglibot ni Presidente Duterte, angay nila nga usbon ang Konstitusyon. Unya, nagtuo ba kamo nga sayon ra ang pag-usab sa atong Batakang Balaod? Ang tubag, dili g’yud sayon.

Pero klaruhon nako, pabor ko nga kadtong mga opisyal sa mga barangay nga gideklarar nga drug-free, hatagan sila og premyo pinaagi sa pagpabilin kanila sa ilang mga puwesto hangtod nga matakda na ang sunod nga eleksiyon.

Dinhi sa dakbayan sa Sugbo, ambot kon duna ba’y mga barangay nga maisip nga drug-free. Tingali lahi ang kahulogan sa drug-free diha sa Barangay Ermita, Duljo-Fatima, Suba, Pasil, Lorega, ug uban pa. Ang kahulogan sa “drug-free” dihang mga lugara mao nga hapit ipanghatag na lang ang shabu. Unsaon, daghan sa mga opisyal niining maong barangay magkiyugpos ra man sa ilang mga bukton.