Kabalaka sa BRT

May rason baya ang kabalaka sa ubang mga motorista nga moabot ang panahon nga atong masinati ang mas grabe nga problema sa trapiko dinhi sa dakbayan sa Sugbo tungod sa pagpatuman sa Bus Rapid Transit (BRT) subay sa pinili nga mga karsada sa atong siyudad.

Ang rason niini tungod kay dili kaayo lapad ang mga karsada dinhi sa dakbayan sa Sugbo nga anha paagia ang BRT, ug kay hatagan man kini og “exclusive lane” sa ato pa nga mogamay ang agianan sa ubang sakyanan.

Gani, ang pasiuna nga plano mao nga dili na paagion ang mga public utility jeepney (PUJ) diha sa mga karsada nga maoy rota nga agian sa BRT. Sa pasiuna nga plano, anha sa tunga sa karsada maghimo og two-way nga “exclusive lane” sa BRT, ug ang daplin niini mao’y mahimong agian sa ubang sakyanan.

Tinuod, hagip-ot kaayo ang atong mga karsada dinhi, dili sama didto sa Bogota ug Curitiba nga lapad na kaayo ang ilang karsada kay sa paghimo pa lang niini, gikonsiderar na man nila daan nga moabot ang higayon nga magmugna sila og BRT.

Kini mao’y rason nga malampuson ang BRT didto sa Curitiba ug Bogota, apan ang kahagip-ot sa karsada didto sa Hanoi, Vietnam, mao usab ang nakaingon nga ang BRT didto wala g’yud magmalampuson.

Gitan-aw nako ang hulagway sa BRT pinaagi sa internet ug akong nahibaw-an nga tungod sa grabe na kaayo ang problema sa kahuot sa mga sakyanan sa lugar nga gitagana sa mga motorista, dunay wala makaagwanta ug diha na sila misubay sa BRT exclusive lane.

May lagda man gud diay nga samtang magsunod ang mga bus nga mobiyahe subay sa BRT lane, apan adunay distansya nga ilatid, sama pananglit nga kinahanglang adunay dos minutos nga interval.

Daghang mga eskina nga agian ang BRT route, ug diha niining mao’ng mga eskina, anha moagi ang ubang sakyanan. Kay matag dos minutos duna may moagi nga BRT sa iyang exclusive lane, sa ato pa, mapugos paghunong ang mga sakyanan nga gustong mo-cross sa BRT route.

Sa akong pagtimbang-timbang, makamugna g’yud kini og grabeng problema sa trapiko. Huna-hunaa ra gud, sa dos minutos nga pagdagan sa sakyanan diha sa mga eskina, pila ra ka sakyanan ang makalusot.

Ang nindot g’yud nga palapdan usa ang atong mga karsada nga anha moagi ang BRT. Apan dili kini madali tungod kay pwerteng daghana nga mga building, mga kahoy, ug uban pa nga estraktura nga maapektohan.

Akong awhagon sila si City Administrator Nigel Paul Villarete ug Atty. Raphael Christopher Yap nga mao’y gitugyanan ni Mayor Tomas Osmeña sa pagpatuman sa BRT project nga tun-an g’yud nila pag-ayo ang isyu.

Kuyaw kaayo kon mahisama kita sa ubang dapit, sama didto sa Ching Qing, China, nga ang ilang gipatuman nga BRT Project, wala g’yud magmalampuson ug naanugon na lang ang dakong gasto. Luoy unya kaayo ang atong nasud nga magbayad sa utang nga dili mapahimuslan.

Nakasabot ko nga nindot kaayo ang BRT Project, apan kinahanglan nga lapad kaayo ang atong mga karsada aron nga dili masakripisyo ang kadaghanan sa mga sakyanan.