Mga saad tumanon

Adunay pipila ka nagminahalay nga sagad mohimo og panaad nga kamatayon ra g'yud ang makabuwag kanila. Ang uban gani moingon man, nga human sa kamatayon, paabuton niya ang iyang minahal didto sa laing kalibutan, aron didto ipadayon nila ang ilang pagminahalay.

Pagkatam-is sa mao nga mga pulong. Apan gituman kaha kini sa mga nagsinaaray? Ang uban gud nga asawa, panahon nga dili makahatag ang iyang bana alang sa iyang kapritso, mangita na kini og lain. Dili ba gud tinuod?

Kanunay g'yud ko nga makadungog sa radyo dyKC nga adunay usa ka edaran na nga babaye, si Manang Alicia Aniñon, nga maghilak ug magpatabang sa mga tigpaminaw aron siya makapalit og tambal alang sa masakiton niyang bana nga anaa na sa ngilit sa kamatayon.

Giantos ni Manang Alicia ang kauwaw. Dili sayon ang gihimo ni Manang Alicia nga magpangayo og tabang gikan sa mga tawo nga dili gani niya kaila. Ang uban tingali magduda pa nga modus kini sa panguwarta.

Apan kon imo g'yud nga hinuktokan, ang gihimo ni Manang Alicia, usa ka kinaiya nga angay'ng panaminan sa ubang mga asawa, o kaha bana, nga matinud-anon kaayo sa ilang mga kapikas bisan og mahulagway nga wala na'y silbe.

Dako nga masakiton ang iyang bana. Usahay ingnon gani siya ni Manoy Faustino nga dili na magpakauwaw sa pagpangayo og tabang kay paabuton na lang niya nga siya mamatay. Apan wala g'yud magpakawala sa iyang paglaum si Manang Alicia.

Kanunay siya nga mag-ampo sa dili pa moadto sa estasyon sa radyo, ug tuod man, daghan ang malooy kaniya, aron kalugwayan ang kinabuhi ni Faustino nga nanginahanglan kanunay og dialysis.

Probinsiyano si Alicia, taga Samboan, ug gitamod g'yud niya ang ilang gipanumpaan ug sa iyang bana, nga kamatayon ra ang makauwang kanila. Kini mao'y rason nga naangkon niya ang akong pagdayeg.

Bisan gani ang program anchor sa dyKC nga si Bob Malazarte, gibati usab og dili matukib nga kalooy. Gusto unta ko nga motabang kang Alicia, apan ang akong kakabus mao'y nagpugong nga dili intawon makahatag og hinabang kaniya.

Pinaagi lang niini, mao'y akong matabang pinaagi sa pagyukbo nako kang Manang Alicia. Wala pa ko makakita kaniya, apan nasuta nako ang iyang pagka buotan. Padayon Manang Alicia sa imong pagpaningkamot nga kalugwayan pa ang mga adlaw sa imong kapikas dinhi sa kalibutan. Unta, daghan pa ang motabang kanimo.

Ang nakanindot ni Manang Alicia kay kon makapalit na siya og tambal para sa iyang bana, mobalik g'yud siya sa estasyon sa radyo, ug magpasalamat sa mga mitabang kaniya. Mga mitabang nga wala gani magpaila sa ilang ngalan.

Samtang nagsuwat ko niini, anam-anam usab nga nanaligdig sa akong kaapingan ang mga lusok sa luha, kay gusto unta ako nga motabang, apan gipugngan ko sa akong kakabus tungod usab sa mga tawo nga tingali gusto g'yud nila nga makita ako nga magutman.

Kon adunahan pa unta ko, tingali, ang gihimo sa mga tawo nga mitabang ni Manang Alicia nga wala gani magpaila, ako usab nga himoon. Apan unsaon, nag-ilaid usab ako sa tumang kakabus.

[email protected].