Tabang ta og bantay

Giaspalto na tuod ang Echavez Street nga nahimutang sa Barangay Lorega-San Miguel, apan nakabantay ko nga duna'y ubang parte sa karsada nga nipis ra kaayo ang pagkaaspalto.

Unsa man ni, humana ni'g aspalto? O sapawan pa kini pagbalik og aspalto? Nakabantay man gud ko nga dihang giaspalto ang Gorordo Avenue, nipis ra ang aspalto nga ibutang nila pag-una, apan sapawan nila kini mao nga mobaga na.

Kon ingon man gani niini ang ilang pag-aspalto, arang-arang na lang. Pero, nganong dili man lang kausahon pagbutang? Kita nga mga motorista, ug ilabi na kamo nga anaa diha magpuyo, tabang mo pagbantay kon giunsa pag-aspalto ang karsada.

Para kanako, dako g'yud kaayo'g tahas ang mga inspector sa Department of Public Works and Highways aron dili mausik lang ang kuwarta sa kagamhanan.

Wala malilong sa katawhan nga daghang karsada dinhi sa Dakbayan sa Sugbo nga gipang-aspalto sa kontraktor nga gikontrata sa DPWH.

Gawas nga nakapasakripisyo sa publiko ang maong mga kontraktor kay gikaras-karasan nila ang karsada ug wala dayon aspaltoha, nabantayan nga dili usab maayo ang ilang pagkaaspalto sa karsada.

Klaro kaayo nga nipis ra ang aspalto nga gibutang ug wala usab mapatag pag-ayo ang pag-aspalto sama diha sa Echavez Street sa Barangay Lorega-San Miguel.

Daghan ang gibati og kabalaka nga kon magduka-duka lang ang inspector sa DPWH, o kaha tuyoon ra g'yud nila nga aprobahan ang proyekto bisan sa klaro kaayong dili maayong pagkatrabaho, mausik lang ang kuwarta sa kagamhanan.

Sama gud diha sa Fuente Osmeña, wala g'yud tiwasa pag-aspalto ang tanang karsada nga nagpalibot sa rotunda. Daghan ang nabalaka nga tingali og ang kontraktor niini maningil og bayad ug ipatuo nga giaspalto nila ang tanang karsada palibot sa rotunda.

Aw, kon mahitabo nga ang kontraktor maningil og ipatuo nila nga ilang giaspalto ang tanang karsada nga nagpalibot sa rotunda, unya mamatud-an sa Commission on Audit nga dili kini tinuod, hayan nga maapil nga malambigit ang mga opisyal sa DPWH nga mopirma aron kabayran ang dili unta angay'ng bayaran.

Angay usab g'yud nga mohimo sa ilang tahas ang kadagkoan sa COA, o kaha ang mga Non-Government Organization nga sinati niining maong matang sa trabaho aron dili mausik ang kuwarta sa kagamhanan.

Kinahanglan g'yud nga kitang katawhan magmabinantayon kanunay aron dili kita malimbongan. Dili imposible nga adunay mga inspector sa DPWH nga makigkunsabo sa mga badlungon nga kontraktor.

Kini pinaagi sa pag-aprobar ra nila sa proyekto ug ipatuo nga human na, bisan og sa tinuod wala pa makompleto ang proyekto.

* * *

Uy, lain pa'y ato, gidayeg nako ang mga sinaligan ni Mayor Tomas Osmeña kay gitaktak g'yud nila sa katungdanan ang usa ka traffic enforcer nga dumadapig g'yud sa mayor, tungod kay matud pa nakahimo og dakong sala.

Kana g'yud, dili kay laban-labanan ang nakahimo og sayop. Bisan og dumadapig pa sila sa mayor, kinahanglang taktakon sa serbisyo. Buyno, dili usa nako ibutyag dinhi ang ngalan sa maong traffic enforcer, kay hatagan nako siya og higayon nga makahatag kanako sa iyang pagpasabot, kon gusto niya.

Bilib g'yud ko ni Atty. Marie Velle Abella nga akong amiga, hepe sa Human Resource Development Office.

[email protected].