Pagsulbad sa trapiko

Wala malilong kang Cebu Governor Hilario Davide III ang grabeng problema sa trapiko diha sa Talisay, Minglanilla, paingon na ngadto sa Carcar.

Sa Naga, dili hinoon kaayo problema ang traffic kay lapad na man ang karsada, apan inig-abot sa San Fernando paingon na sa Carcar mobalik na usab ang problema.

Kon ako mao’y gobernador, ipatawag nako og tigum ang mga mayor sa nahisgutang mga lungsod aron estoryahan ang pagpangita og paagi nga maiban-ibanan kon dili man g’yud masulbad ang problema.

Kini usab maoy angay’ng himoon unta sa mga mayor diha sa ubang mga lungsod ug siyudad, sama sa Mandaue, Lapu-Lapu, Consolacion, Liloan, Compostela, ug Danao.

Usa sa angay’ng himoon mao g’yud ang pagputol sa ilang kahadlok nga dili na makadaog sa subli nila nga pagpapili sa katungdanan. Ang tinuod, sagad sa mga opisyal mahadlok nga mohimo’g estrikto nga lakang kay mahadlok nga wala na’y moboto kanila sa piniliay.

Ang una nga angay’ng himoon mao ang pag-estrikto nga dili na g’yud paparkingan ang daplin sa karsada. Ang karsada wala himoa aron himoon nga parking area sa mga tag-iya og sakyanan.

Ikaduha, kinahanglan nga hugton sa mga opisyal ang ilang bakus ug did-an na g’yud ang pagpaagi sa mga tricycle diha sa mga national highways kay kini mao’y nakatampo sa problema sa trapiko.

Adunay balaod nga ang mga tricycle dili g’yud tugotan nga makabiyahe subay sa mga national highway, ilabi na nga ang ubang drayber kiat kaayo momaneho, ug ang uban sab mura’g nag-drive og porlon.

Ikatulo, kinahanglan nga ang mga traffic enforcer modakop g’yud sa mga malapason sa balaod. Dili kay maayo lang sa paghinambog nga usahay tuyoon g’yud nga magbilangkad nga magbarug sa karsada, apan hadlok diay nga manakop.

Kon manakop man sab, dili na moagi ang ballpen kon tunolan sila og suborno sa mga drayber nga ilang madakpan. Ngano man nga nakahuna-huna ko nga mag-abot ang mga mayor ug hisgotan ang problema?

Kini tungod kay ang problema sa trapiko dili masulbad kon ang usa lang ka local government unit ang mohimo’g paagi. Pananglit ang Minglanilla maningkamot nga mopaspas ang dagan sa mga sakyanan nga moagi sa ilang dapit, magpunsisok lang gihapon kon barado ang sakyanan inig-abot sa Talisay.

Unya, kinahanglan usab nga dasigon ang mga tag-iya og bakante’ng yuta daplin sa karsada nga moabli sila og “parking area” nga pabayran sa mga mo-parking. Suwayi kuno, sir governor.

* * *

Nakontrobersyal pag-ayo si Senador Cynthia Villar tungod sa iyang balaudnon nga wad-on na ang unli-rice diha sa mga kan-anan. Aron kuno kini paglikay nga makamugna og sakit kay motaas man ang blood sugar kon daghang rice ang kan-on.

Pastilan, mapugngan ba diay nimo ang tawo nga mokaon og subra sa usa ka order nga rice? Kon wala na’y unli rice, ang mahitabo niini nga makabayad na hinoon og dako ang mokaon og subra sa usa ka tasa.

Wala na man tawon mo’y nahuna-hunaan uy. Pareho ra man mo niadtong misugyot nga ilisan ang ngalan sa atong nasud. Porbida!