Team Rama ilisan?

Mura’g pipila ka adlaw gikan karon, wad-on na ang pulong “Rama” diha sa pundok sa oposisyon dinhi sa Dakbayan sa Sugbo. Pagka karon, ang Team Rama, gidugangan og pulong “barug”, ug gihimo na nga Barug-Team Rama.

Tingali, abi kay gibugal-bugalan pag-ayo ni Mayor Tomas Osmeña ang bag-ong ngalan sa politikanhong grupo sa iyang kaatbang pinaagi sa pag-ingon nga human nagluhod-luhod si kanhi mayor Michael Rama, mao nga gihimo na nila nga Barug-Team Rama ang ngalan sa ilang grupo.

Bisan ang ubang sakop sa Team Rama wala makagusto nga gibutangan og pulong “barug” ang ngalan sa ilang grupo. Masabot kuno nga abi kay nahisukamod man sa miaging eleksyon, mao nga angayan kini nga mobarug.

Sa among panagsultihanay kagahapon og ni Vice Mayor Edgardo Labella, gitug-anan ko niya nga ang ubang sakop sa ilang grupo gusto nga ilisan ang ngalan gikan sa Barug-Team Rama ug posible nga himoon na nga Barug Panaghiusa.

Ang rason niini kay ang inahan ni Konsehal Joey Daluz III nga si Inday Nita Daluz, dakong opisyal sa Partido Panaghiusa. Ang pundok ni Inday Nita kaniadto ilado kaayo dinhi sa Sugbo ug daghan og mga dumadapig.

Para nako, nindot kaayo ang maong plano sa mga opisyal sa Team Rama. Apan  dili ba kaha bugal-bugalan na usab ni Osmeña ug ingnon nga maong wad-on ang pulong “Rama” kay ang kanhi mayor wala na g’yuy “amor” sa mga botante?

Bitaw, dili g’yud kita makapugong og unsa’y himoon sa mga opisyal sa Team Rama nga aron molig-on pagbalik ang ilang pundok. Pareho karon, dili na usab sila “majority” diha sa Cebu City Council.

Nagpasabot nga mosamot nga gamhanan na kaayo ang pundok ni Mayor Osmeña ug wala na’y makababag sa gusto niya nga himoon.

* * *

Lain pa’y ato, nalipay ko sa plano ni Mayor Osmeña nga papaspasan niya ang pagpaaprobar sa ordinansa nga maghatag og gahum sa mga traffic enforcer sa Dakbayan sa Sugbo nga makasakmit na og lisensya sa mga drayber nga makahimo og kalapasan sa pagmaneho’g sakyanan.

Karon gud, dili kaayo mahadlok ang kadaghanan sa mga drayber kay dili man makasakmit og lisensya ang mga traffic enforcer nga armado lang og Traffic Citation Ticket. Ang bugtong mahimo sa mga traffic enforcer mao ra ang pagrekord sa kalapasan nga nahimo sa drayber, unya ilista nila didto sa Traffic Violations Bureau.

Kinahanglan pa nga pasakaan og kaso ang drayber didto sa hukmanan aron nga kini mapugos sa pagbayad sa iyang multahan. Gani, ang ubang drayber dili gihapon magtagad bisan og napasakaan na og kaso.

Adto na sila magkara-kara sa pagbayad kon ang hukmanan moisyu na og bench warrant tungod kay ang maong drayber wala motunga atol sa paghusay sa kaso. Para kanako, ang mga buotang drayber dili angay’ng mahadlok nga hatagan og gahum ang mga traffic enforcer pagsakmit sa lisensya sa makasala sa balaod sa trapiko.

Pinaagi niini, dili na magpabadlong ang mga badlungong drayber. Unsaon, ang mga sakop sa Land Transportation Office, wala man g’yud molihok sa pagpanakop sa mga abusadong drayber.

Anugon lang ang nindot nilang sakyanan ug ang nindot nilang uniporme.