Martial law wala kinahanglana dinhi

Ang martial law dili man g’yud angay’ng kahadlokan basta dili lang moabuso ang mga militar ug kapolisan. Apan, ang problema diha kon moabuso sila ug magpataka lang pagpanakop bisan og wala’y basehanan.

Ang kuyaw diha kon kasuyaan ka sa sundalo ug kapolisan, unya dakpon ka lang dayon ug butang-butangan og sala, dayon bilanggoon ka sa ilang kampo. Kon suspensuhon ang Writ of Habeas Corpus, dili ka na g’yud mabuhian mentras gusto pa nila nga tanggongon ka.

Unta, si Presidente Duterte motimbang-timbang g’yud pag-ayo sa iyang mga lakang kay basin og mosipyat siya nga ideklarar niya ang martial law dinhi sa Kabisay-an bisan og wala kini kinahanglana.

* * *

Ang publiko giawhag sa kadagkoan sa Office of the Building Officials (OBO) nga motabang sa pagpahibalo kanila bahin sa mga illegal structures nga ilang makit-an. Mipasalig si OBO chief Engr. Josefa Ylanan nga aksyonan nila ang report nga ilang madawat.  Sayon ra ang pag-ila sa mga illegal structure nga wala makatuman sa gilatid sa balaod, ilabi na ang setback gikan sa property line nga giugbokan sa mao nga building. Tuod, mitabang ko sa paghatag og report sa OBO, apan natan-aw nako nga mura’g wala may kapuslanan.

Ang lagda nga gilatid sa Presidential Decree 1096, kon National Building Code, wala’y building nga pagatukoron kon dili usa mokuha og building permit ang tag-iya. Klaro kaayo kini sa Section 301 sa National Building Code.

“No person, firm or corporation, including any agency or instrumentality of the government shall erect, construct, alter, repair, move, convert or demolish any building or structure or cause the same to be done without first obtaining a building permit therefor from the Building Official assigned in the place where the subject building is located or the building work is to be done.”

Klaro man tingali kaayo nga dili na angay’ng binisay-on pa aron masabtan. Duna’y usa ka gitukod nga estraktura diha sa V. Gullas, tupad sa usa ka department store, nga gisugdan sa pagtukod bisan og wala pay permit.

Moingon ko nga wala’y permit kay gitug-anan ko ni Engr. Ylanan nga gipadad-an nila og Notice of Violations ang tagdumala sa maong gitukod nga building. Ang kalapasan niini mao nga wala’y setback gikan sa sapa nga kabahin sa Parian Creek ang dapit sa likud.

Unya, ang atubangan sab sa karsada, wala sa’y setback gikan sa property line. Moingon gani og property line, mao kana ang utlanan sa yuta lapas sa aseras. Ang maong gitukod nga estraktura ang haligi naa g’yud daplin sa aseras. Asa man ang setback?  May laing balay nga gitukod sab diri sa V. Gullas Street, wala gihapo’y setback. Matud ni Engr. Ylanan nga giisyuhan usab nila og Notice of Violations, apan ang tag-iya nagpadayon pagtukod ug wala manumbaling sa OBO.

Resulta, hapit na mahuman ang maong dakong balay nga gitukod daplin sa karsada nga wala gihapo’y setback. Unsa man, wala g’yuy ngipon ang OBO aron pagpahunong sa mga illegal nga kalihukan? Kamong mga opisyal sa barangay, unsa man sab ang inyong gihimo?

Wala ba kamo makabasa nga aduna’y ordinansa nga may katungod man kamo pagpahunong sa mga illegal construction?