Pagbarato sa lana
Padayong nitibugsok ang presyo sa lana sa merkado sa kalibotan. Nga gipaabot nga mosangpot sa laing dakong us-os sa presyo sa krudo ug gasolina sa Sugbo ug sa Pilipinas karong Martes, nga mao’y nasabutan nga adlaw sa pagpatuman sa sinemana nga kausaban sa lokal nga presyo sa lana.
Nitugsad ang presyo sa lana sa labing ubos nga ang-ang sukad niadtong Nobyembre 29, usa ka adlaw sa wa pa maumol ang kauyonan sa Organization of Petroleum Exporting Countries (OPEC) paglaslas sa ilang produksiyon. Ang saad pagsulbad sa sobrang kalibotanong suplay sa lana nisangpot sa pagsulbong sa presyo sa niaging lima ka buwan.
***
Ang laslas sa produksiyon nga gisugdan niadtong Enero, nga maoy labing una nga gipatuman sa OPEC sukad sa 2008, nakapabuhi sa dugo sa mga nakabubo og puhonan pinasikad sa pagsalig sa mas mahal nga presyo sa lana.
Nisamot ang pagsalig nga nahuman nang dul-an sa duha ka tuig nga pagtibugsok sa presyo tungod sa pasalig sa Russia ug ubang non-OPEC countries nga laslasan sang ilang produksiyon. Mas nilig-on ang pagtuo nga makabawi nang lana dihang ang OPEC ug non-OPEC countries nipakita og abundang timaan pagtuman sa ilang kasabutan.
***
Apan nibalik og lugapak ang presyo sa lana tungod sa kapaspas sa shale oil producers sa Estados Unidos, ginamit ang labing bag-ong mga teknolohiya ug mas madaginuton nga sistema sa produksiyon, sa pagpabaha og dugang suplay. Ang posibleng pagbalik sa Estados Unidos og pamaligya og lana sa ubang kanasuran makahulga sa cartel ug ubang tradisyonal nga oil producers.
Wa sang katabang sa kawsa pagpaburot sa presyo sa lana ang padayong pagtidlom sa kalibotanong demanda sa gasolina ug sa wa mahinayon nga pangagpas sa pagsaka sa demanda sa China ug India.
***
Laing mga hulga sa lana: Ang pagsulbong sa produksiyon gikan sa Libya ug Nigeria, nga pulos wa maapil sa kauyonan sa OPEC, ug ang baruganan sa Russia nga di na molaslas sa produksiyon sa ikaduhang tunga karong tuiga.
Gipaabot nga tukion sa tigom sa OPEC karong Mayo 25 ang padayong paglaslas sa produksiyon hangtod sa Septiyembre. Ang dakong tidlom sa presyo mahimong makapugos sa OPEC pag-inat sa laslas hangtod sa sunod tuig.
- Latest
