Pabiling pakyas ang higanteng mga kompaniya sa telepono sa pagsulbad sa labing dakong limitasyon sa smartphones kon itandi sa unang henerasyon sa cellphones mao ang kadali rang mabasiyo sa baterya. Mas taas og lahutay ang karaang mga telepono kay tawag ug text ra may mahimo. Mas paspas nga moawop ang bag-ong mga telepono tungod sa mas mabulukong touchscreens ug mas dagko ug paspas nga mga himan.
Bisan giunsa nila og paningkamot, wa molampos ang mga eksperto pagmugna og bag-ong mga baterya nga makalahutay sa tibuok adlaw. Maong nitahan na lang ug nitingob sa ilang pagtukaw sa paghimong mas paspas sa charging sa mga baterya.
***
Napandol kining bag-ong lumba sa niaging tuig tungod sa makauuwaw’ng eskandalo nga nahiagoman sa labing dakong kompaniya sa telepono karon sa tibuok kalibotan, ang Samsung: Ang pag-ulbo sa mas gamhanan nga mga baterya sa ilang labing bag-ong telepono.
Human sa pagkamugna sa Quick Charge 1.0 niadtong 2013, nga 40% nga mas paspas sa charging sa mga baterya, gitakdang ipasukip sa smartphones nga manggawas karong tuiga ang gipasalig nga mas paspas pa gyod apan luwas nga Quick Charge 4.0.
***
Duha ka managlahi nga teknolohiya ang gipaabot nga modominar sa pagtubag sa kahigwaos sa mga konsumidor sa quick charging sa smartphones:
• Ang Quick Charge 4.0, nga mosubay sa USB-C standard (nga gipalabi sa Google, ang nagmugna sa Android), nipasalig nga makahatag na og lima ka oras nga kinabuhi sa baterya ang lima lang ka gutlo nga charging; ug
• Ang Dash Charge, nga di mogamit sa mas taas nga boltahe nga mopainit sa telepono kon dili sa mas taas nga current nga charger ray moinit apan mopabiling bugnaw sa telepono, nigarantiya nga ang 30 ka gutlo nga charging makapalahutay na sa baterya sa tibuok adlaw.
***
Gipasidan-an hinuon ang mga konsumidor sa di pagpalingla sa mga numero. Kay ang charging mas paspas kon mabasiyo ang baterya, apan kon moabot nag 60% pataas mas hinay nang charging.
Wa moapil sa lumba sa pinaspasay sa charging ang Apple. Nga igo lang nipasalig nga ilang iPhone 8 nga ipagawas sa mosunod nga mga buwan ma-charge nga wa nay kable.