Kalibog ni Duterte
Sa unang pagtumaw sa kalibog sa nag-usab-usab nga mga pamahayag ni Presidente Rodrigo Duterte sa unang mga adlaw sa iyang pamunoan, nitambag ang iyang mga tigpamaba sa mga sakop sa media nga nadestino sa Malakanyang sa pagkonsulta sa mga sakop sa media nga nag-cover ni Duterte sa niaging duha na ka dekada isip mayor sa Davao City.
Matod nila ang media sa Davao maoy labing nasuhito kanus-a si Duterte magpasiaw ug mag-seryuso. Kahibawo sila unsay kahulogan sa mga lihok sa iyang mata, porma sa nawong ug lihok sa lawas.
***
Apan wa magsilbing tambag. Bisan ang media sa Davao nikumpisal nga maglisod sab pagtugkad sa tinuod nga mga mensahe ni Duterte. Nabantang nga sila mismo naglibog ni Duterte sa iyang pagtugpa sa Davao gikan sa Japan niadtong Oktubre.
Atubangan sa reporters nga nisugat niya sa Francisco Bangoy International Airport, nga naglakip sa taga Manila ug taga Davao, nideklarar si Duterte nga di na mamalikas kay nakigsulti niyang Ginoo sa ayroplano. Ang taga Manila ug taga Davao pulos nakugang sa iyang pagkumpisal pagka sunod adlaw nga nagkomedya ra diay.
***
Sa niaging semana, Si Duterte nisubli pagpasabot nga di angayng seryusuhon ang tanan niyang sulti. Matod niya nga sa tanan niyang istorya, ma-diskurso man o pakighinabi sa media, ang seryusong mga pamahayag sagolan gyod niya og pasiaw.
Nipasabot si Duterte nga mao lang gyod ni ang iyang taras. Ganahan lang gyong magpakatawa aron pagpagaan sa iyang gibati ug sa mga naminaw niya. Kon masayop ang katawhan, apil nang mga sakop sa media, sa pagsabot niya, gitataw ni Duterte nga di na kana iyang problema.
***
Tungod ini, nipagawas ang Malakanyang og bag-ong tambag unsaon pagsabot sa tinuod nga mga mensahe ni Duterte: Paabota ang opisyal nga katin-awan gikan sa palasyo. Buot ba nilang ipasabot nga di una ta motuo bisan unsay sulti sa presidente kon di pa dasonan sa iyang mga tigpamaba?
May nakahunghong ba sa mga naglibot ni Duterte nga gihimo nila siyang pahoy? Laing problema: Kon mas kasaligan ang mga tigpamaba kay ni Duterte, kinsa man ang dangpan sa media ug sa katawhan sa mga higayon nga ang mga tigpamaba mao na say mangasayop?
- Latest
