Pagbomba sa atong silingan

Daghang polis ug sundawo ang gipakatap sa piyesta sa Hilongos, Leyte. Apan way nakahunahuna sa pagpahamtang og bisan unsang sistema sa seguridad sa Plaza Rizal nga gipahigayonan sa boksing ug ubang kalingawan ug gipunsisokan sa labing daghang katawhan. Way nagsusi sa palibot sa boxing ring ug sa kinatibuk-an nga venue sa wa pa magtapok ang baga nga manan-away.

Wa sab makatabang nga ang Plaza Rizal, bisan nahimutang pila ra ka metro gikan sa munisipyo ug sa presinto sa kapolisan, naa ra daplin sa dan busa bukas alang ni bisan kinsa nga mosud ug mogawas. Gawas pa, way nadunggan ang kapolisan, militar ug lokal nga mga opisyal nga bisan unsang pasidaan sa pagpamomba.

* * *

Kon kinsa may responsable sa pagpamomba, nga giingon sa kapolisan ug militar nga maoy labing una sa Leyte ug sa tibuok Eastern Visayas karong tuiga, wa gyod maproblema sa pagtanom sa tulo ka eksplosibo: Ang una niulbo duol sa operator sa sound system; ang ikaduha nga niulbo human sa pila ka segundo nahimutang tulo ra ka metro gikan sa una; ug ang ikatulo nga wa kabuto gibutang gawas sa simbahan.

Si Najib Cubio, kanhi reporter sa DYAB Radyo Patrol, nisaka na sa ring pagpahibawo sa resulta sa boksing kay siya may announcer, dihang nahitabo ang duha ka sunudsunod nga pag-ulbo. Matod niya nadugangan ang mga naangol sa mga bomba kay may mga nayatakan sa pagdinaganay.

* * *

Gisukisukit dayon sa kapolisan ang duha ka dumuduong nga taga Mindanao ug gipatawag ang pangu sa Muslim community sa Hilongos apan niangkon nga wa pa silay mga suspitsado ug wa pa silay gisalikway sa nagkalainlaing anggulo sa pagpamomba.

Gisusi sa mga imbestigador ang posibleng kalambigitan sa mga rebeldeng komunista nga nagpabiling aktibo sa Leyte, o sa mga rebeldeng Muslim nga gipasanginlan nga unang nanghulga sa Sugbo, o mga durugista nga nanimawos sa agresibong kampanya sa kapolisan batok nila, o panagsungi sa negosyo, politika o personal.

* * *

Si Najib, nga lumad sa Hilongos, nihulagway sa piyesta karong tuiga maoy labing sadya nga iyang natambongan. Gawas sa boksing ug sa naandan nga perya, may gipahigayon sang panagtigi sa soccer, basketball, tennis, table tennis, sepak takraw, triathlon, street dancing ug drum and bugle. Way nagpaabot nga mamantsahan og dugo ang malinawon nilang lungsod.

Ang pagpamomba sa Hilongos, lahi sa sunudsunod nga pagpamomba sa nagkalainlaing bahin sa Mindanao, mas makapatay-og sa Sugbo kay tulo ka oras ray nag-uwang sa masig ka pantalan ug labihan ka suod sa masig ka katawhan. Makaapektar ni, ug angay lang, sa pagpangandam sa mas lapad nga seguridad sa mas dakong Piyesta Senyor ug Sinulog Grand Parade sa Sugbo duha ka semana na lang gikan karon.