Nindot kaayo kon dili na gamiton ang dalan Colon sa pagpahigayon og night market dinhi sa dakbayan sa Sugbo. Hasol kaayo alang sa mga motorista kon ang night market anha sa Colon ipahigayon kay agianan kini sa daghang sakyanan.
Daghan kaayong karsada dinhi sa dakbayan sa Sugbo nga panahon sa gabii wala nay mangagi ug mao kini ang dapit nga angay'ng adto ipahigayon ang night market.
Apil sa mga karsada nga angay'ng adto ipahigayon ang night market mao ang Plaridel Street, atubangan sa Luym Building ug ang F. Gonzales Street nga duol ra sa Carbon Market.
Para kanako, nindot pa kining maong mga karsada nga himoan sa night market kay walay mga motorista nga mahasol kay wala may rota sa mga PUJ nga moagi diha.
Kon sa Colon gud himoon ang night market, pastilan, daghan kaayo ang mga PUJ nga mahasol kay dili na man kaagian ang maong karsada tungod kay mapuno na man kini sa mga tindahan.
Ang sugyot ni Nagiel Bañacia, pangulo sa Cebu City Disaster Risk-Reduction and Management Office, nga adto sa dalan Sanciangko ipahigayon ang night market, mas bentaha og gamay, apan mas nindot gyud kon adto sa Plaridel ug F. Gonzales Streets ipahigayon.
Ang dalan Sanciangko gud daghan gihapon ang mga sakyanan nga mangagi ug kon mao kini ang sirad-an kay anha himoa ang night market, ang mga sakyanan magpunsisok na usab pag-agi sa Colon.
Angay'ng hinuktokan sa mga opisyal sa dakbayan sa Sugbo kining maong sitwasyon sa dili pa sila mopakanaog sa ilang hukom karong adlawa.
***
Maayo ang gihimo sa Cebu City Transportation Office (CCTO) nga gibutangan nila og puthaw nga barandilya ang M.J. Cuenco Avenue atubangan sa dakong hardware sa Mabolo.
Tumong sa pagbutang og puthaw nga railings aron nga dili na makasayon-sayon og "backing" ang mga trak de karga nga gipanag-iya sa hardware. Kining maong hardware, dugay na kaayo kini nga gireklamo, apan wala gyud tagda sa kadagkoan kaniadto sa CITOM.
Salamat ni CCTO operations chief Francisco "Isko" Ouano kay giaksyonan na gyud ang reklamo nga gibungol-bungolan lang kaniadto sa mga nagdumala sa CITOM.
May awhag diay ko ni Ouano nga aksyonan nila kining balay patigayon nga nagnegosyo og puthaw diha sa dalan Sikatuna, duol nianang gamay'ng sapa diha sa dalan Bonifacio Street.
Ang mga puthaw nga baligya niining maong balay patigayon anaa gidaylang atubangan sa ilang building ug lisud na nga maagian og mga tawo ang lugar nga para unta sa aseras.
Gawas nga gigamit nila ang aseras nga pundohanan sa ilang mga puthaw, kanunay'ng giparkingan og mga sakyanan ang maong dapit. Resulta, masakripisyo ang mga motorista nga anaa mag-again sa dalan Sikatuna.
Ang tag-iya niining maong building nga nagnegosyo og puthaw, nakalapas usab gani sa balaod kay ang lapad unta nga sapa kaniadto diha nahimo na lang gamay kay ang ilang building, miabot na sa taliwala sa tulay.
Klaro man kaayo nga makita ang kalapasan kay ang tulay gihimo kini kaniadto pa nga 1940. Samtang ang pikas nga building nagpabilin sa iyang nahimutangan, ang building sa atbang nga gigamit karon sa negosyo sa puthaw, halos miabot na sa tunga sa tulay.
Sa ato pa, migamay ang sapa ug mao kini ang rason nga kon adunay uwan, moawas dayon ang tubig ug makapalunop diha sa dalan Bonifacio. Nindot usab unta kon hingusgan ni Mayor Osmeña ang river ug creek restoration dinhi sa dakbayan.
Ang Department of Public Works and Highways (DPWH) adunay gigahin nga P700 milyones para sa pagpalapad pagbalik sa kasapaan, apan ang problema kay wala pa mapabalhin sa dakbayan ang mga namuyo daplin sa kasapaan.