Unang duha niya ka biyahe gawas sa Luzon human sa kamatayon sa iyang bana pulos paingon sa Consolacion sa amihanang Sugbo. Ang unang biyahe maoy labing lisod. Kay maoy labing una niyang sakay sa ayroplano sukad sa paghagsa sa ayroplano nga gisakyan sa iyang bana sa kadagatan sa Masbate.
Sa ikaduha niyang biyahe, gibuyag na sa iyang mga higala. “Nganong magsige man ka og balik sa Consolacion?,” nanungog sila niya. Giawhag siya sa pagduaw sa mas dagkong dakbayan ug kalungsoran sa Sugbo ug sa ubang bahin sa Kabisay-an ug Mindanao. Nitambag sila nga ang pagpakita sa mas daghang dapit makatabang niya pagsusi sa kahigayonan pagdagan og nasudnong katungdanan.
***
Human sa pasiunang pagtimbang-timbang, nakahukom siya nga di mangambisyon pagdagan pagka senador o sa mas taas nga katungdanan. Nikumpisal gani sa iyang pagtambong sa Arangkada sa dyAB Abante Pa, Bisaya! Nga nagduhaduha pa magpapili ba pag-usab pagka kongresista sa ikatulong distrito sa Camarines Sur.
Gitumbok ang mosunod nga mga hinungdan sa iyang panagana:
• Nakasaad sa tulo ka anak babaye human nailo sa amahan nga mosuway lang og hupot og usa ka termino sa Kongreso;
• Wa siyay politikanhong makinarya ni katakos ug katigayonan sa paglusad og nasudnong kampanya; ug labaw sa tanan
• Di pa andam ang iyang panghunahuna sa pag-angkon og mas dakong responsibilidad sa pagduma sa nasud.
***
Sunod niyang duaw sa Arangkada sa dyAB Abante Pa, Bisaya! nakadawat na og pormal nga tanyag gikan nilang Presidente Noynoy Aquino ug kanhi Interior secretary Mar Roxas sa pagdagan pagka bise presidente human nibalibad si Senador Grace Poe kinsa nilusad na sa iyang kandidatura pagka presidente.
Nasulbad nang kakuwang sa politikanhong makinarya kay sabakon na man siya sa gamhanang partido sa administrasyon. Apan padayong nagduhaduha kay di pa gihapon andam ang panghunahuna, wa siya mailhi gawas sa iyang distrito ug maglisod na pag-apas sa mas inila niyang mga kaatbang nga nakabuylo na og kampanya sa niaging duha ka tuig.
***
Dihang sa kataposan nisugot nang makig-pares ni Roxas, giduaw niya pagbalik ang Consolacion. Aron pagsubli pagpasalamat sa ilang paghangop sa iyang bana sa kataposang adlaw sa iyang kinabuhi ug pagsaad nga ipadayon ang wa pa mahumang tahas sa iyang bana pagtarung sa gobiyerno ug pag-alagad sa katawhan.
Sa niaging piniliay, napilde siya sa dakong bahin sa Metro Cebu apan nidaog sa Consolacion, sa tibuok Sugbo ug sa mas daghang bahin sa Pilipinas nga makugihon niyang giduaw. Iproklamar na siya isip mananaog sa ikaduhang labing taas nga katungdanan sa nasud karong Lunes human sa pagtapos sa opisyal nga iskutenyo atol gyud sa sumad sa adlaw’ng natawhan sa iyang bana. Kinsa iyang nabatyagan nga padayong nigiya niya bisan namatay upat ka tuig na’ng nilabay.