Daghan gyud ang nagtuo nga kon magkaduol na ang adlaw sa eleksyon, anam-anam ra nga makasabot ang mga botante kon kinsa gyud ang angay'ng botohan pagka presidente sa nasud.
Makasabot ra ang katawhan nga ang pagdumala sa nasud dili mahimo pinaagi lang sa pag-inisog. Sama ra gud sa pagdumala og usa ka kompaniya nga kon kanunay ka ra nga mag-inisog, moabot ang higayon nga moalsa ang mga kawani.
Ang gikinahanglan nga lider sa nasud mao ang tawo nga maantigo kabahin sa ekonomiya, malumo og kasing-kasing ilabi na ngadto sa mga kabus, estrikto nga mopatuman sa balaod ug dili kawatan sa kuwarta sa kagamhanan.
Kun ang usa ka opisyal sa kagamhanan mopaburot sa kantidad sa pagamugnaong proyekto aron nga ang kontraktor niini dako og mahatag ngadto kaniya, dili gyud kini maayo.
Ibutang nato nga wala gipaburot ang prisyo sa proyekto, apan igo lang mangayo og komisyon ang opisyal gikan sa kontraktor, dili gihapon kini maayo kay ang resulta niini, ang kontraktor mohimo'g paagi aron makabawi siya sa gihatag ngadto sa opisyal.
Kinsa ang alkanse? Kita ra usab nga mga magbubuhis. Imbes ang atong proyekto gamitan unta og 100 ka sako nga semento, tingali 50 na lang ang gamiton sa kontraktor. Ang kabilya imbes dagko aron unta lig-on, gagmay na lang ang gamiton kay aron makabarato.
Nasayod na kamo kinsa ang mga gidungog nga kurakot nga mga opisyal nga nagpapili sa tag-as nga katungdanan sa kagamhanan, gikan sa pagka presidente ngadto sa senador, kongresista, mayor ug konsehal sa mga lungsod.
* * *
Ingon sa "mikakak" si Mandaue City Mayor Jonas Cortes diha nga giimbitar siya pagpatambong sa 888 News Forum didto sa Marco Polo Plaza Hotel kaniadtong Martes aron unta pagsuta sa iyang mga plano nga buhaton kay nagpapili man siya pagka kongresista.
Nakapanglingo-lingo ang ubang reporters nga naghinam-hinam na unta nga maminaw ni Jonas. Kini gud si Jonas, swerte gyud kaayo kon, magpa-interview ni siya sa bisan kinsa nga sakop sa media. Adto ra kini siya magpa-interview sa iyang mga amigo nga media nga dili mangutana kaniya og kontrobersyal.
Abi ninyo og nganong mikakak si Jonas? Diha man gud ang iyang kaatbang nga kandidato pagka kongresista sa 6th district nga si Paulus Cañete. Natan-aw man gud sa mga sakop sa media nga lupigon man gyud si Jonas kun magbayloay sila'g huna-huna mao nga wala na lang mitunga.
Mao ba kana ang angay'ng himoon nga kongresista? Didto sa hawanan sa kongreso, dili kalikayan nga makiglantugi gayud ang usa ka magbabalaod aron panalipdan niya ang iyang giduso nga balaudnon. Ambot og mahimo ba kaha kini ni Jonas.
Makadaghan na ko misuway og interview ni Jonas apan dili gani motubag kon imong tawgon, bisan og magpaila ka pa nga sakop sa media. Wala gani pamatasan nga mobalibad bisan ipaagi na lang sa text message kon ngano nga dili siya magpa-interview.
Kini maoy usa sa rason nga natan-aw nako nga dili gayud haum nga himoong opisyal sa kagamhanan kini si Jonas. Angay'ng mauwaw si Jonas kon mangangkon siya nga tungod kaniya maoy rason sa paglambo sa Mandaue.
Ang tinuod, milambo ang Mandaue tungod sa North Reclamation Area nga giugmad kaniadto ni kanhi Mayor Alfredo Ouano.
Maghuwat pa man og pila ka tuig usa mohulpa ang reclamation project, mao nga wala pa kini matagamtami ang kalamboan atol ni kanhi Mayor Teddy Ouano, ug diha na kini matilawani ang prutas atol sa termino ni Jonas.
Mao kini ang rason nga ang apo ni Ingko Pedong nga si Konsehal Lolypop Ouano-Dizon gusto nga mahimong mayor kay siya ang mopadayon sa mga proyekto nga gustong mugnaon sa iyang lolo kaniadto.
Sama ra kini kang kanhi Mayor Tomas Osmeña nga maoy nag-ugmad sa South Reclamation Project ug daghan siya og pangandoy aron mas daghan pa ang makapahimulos sa abot sa SRP.
Dili kay ang halin sa SRP gastohon ra dayon sa pagpangha-tag og honoraryom sa mga opisyal sa barangay, nga ang uban, nagpasagad lang gani sa kahiwian diha sa ilang mga barangay.