Dili diay wise voter

Angay ba gud nga ikasuko kon si Presidente Aquino wala mopirma sa balaudnon nga maghatag og dugang P2,000 sa binuwan nga pensyon sa mga pensyonado sa Social Security System (SSS)?

Aw tingali, ang mga pensyonado sa SSS masuko gyud kay gusto man nila nga madugangan ang ilang madawat kada buwan. Apan angay tingali nga timbang-timbangon ang rason ni Presidente Aquino.

Kon ang kagamhanan mopausbaw og tag P2,000 nga pensyon kada buwan, mabangkarota kuno ang SSS inig-abot sa tuig 2029.

Apan si Kongresista Martin Romualdez sa Leyte nga dinhi sa Sugbo atol sa Sinulog, miingon nga layo pa kaayo ang 13 ka tuig gikan karon ug ang kagamhanan makapangita pa og paagi nga mosaka ang pundo sa SSS.

Buyno, ang kabalaka ni Presidente Aquino dili usab angay nga ibaliwala lang. Matud ni Kongresista Romualdez may mga collectibles ang SSS bali'g usa ka bilyon ka pesos mao nga dili angay'ng mabalaka ang presidente kon usbawan niya ang pensyon.

Kini hinoong isyuha, sigurado nga sakyan dayon kini sa politika aron dauton ang mga kandidato nga gisuportahan ni Presidente Aquino. May pipila na gani ka pensyonado sa SSS nga nangangkon nga apektado kuno si Mar Roxas sa gihimo ni PNoy.

Kon ingon man gani niini ang ilang basehanan pagpili og presidente nga kadto ra diay'ng makahatag kanila og personal incentives maoy ilang botohan, dili gayud diay sila maisip nga "wise voters."

Basin nakalimot ang mga pensyonado ug ang mga senior citizens kon kinsa ang tawo nga nakapabarato sa mga "maintenance drugs" nga ilang gigamit. Ayaw gyud tan-awa ang personal interest sa pagpili og presidente, kon dili, kon kinsa kadtong makahatag og kaayohan sa kadaghanan.

Labaw sa tanan, ang tawo nga angay'ng himoong pangulo sa nasud kanang dili corrupt.

***

Bilib ko ni Kongresista Raul del Mar kay wala gyud kini mokumpiyansa bisan og gihulagway sa uban nga sigurado na ang iyang kadaugan. Walay hunong si Del Mar sa pagsuroy-suroy sa kabarangayan og gihangop siya sa mga tawo.

Ang kontra gud ni Del Mar nga si kanhi Mayor Alvin Garcia ingon sa napugos ra man sa paglansar. Siyaro og wala siya masayod kon unsay iyang dangatan niining ilang sangka ni Del Mar.

Susama ra kining maong sitwasyon diha sa Mandaue kay si Mayor Jonas Cortes wala kaayo mailhi sa mga botante sa kabarangayan sa Consolacion ug Cordova kay wala man sila makakita kaniya.

Mao kini ang rason nga mas paborito sa katawhan si Dr. Paulus Cañete nga walay hunong sa pagbisita kanila sa ilang mga dapit. Dugay na nga nagbisitahan si Paulus sa ilang mga lugar.

Ingon usab niini ang sitwasyon nila ni Luigi Quisumbing ug Konsehal Lolypop Ouano-Dizon nga magkaatbang sa pagpapili pagka mayor sa Mandaue.

Mura'g mas ilado si Lolypop sa mga botante sa Mandaue kay ni Luigi tungod kay samtang kanunay'ng mobisita si Lolypop sa kabarangayan, si Luigi kapoyan nga mosuroy-suroy.

Kauban sa partido sila si Lolypop ug Paulus Cañete mao nga susama sila nga aktibong nakigsuod sa mga botante, bisan sa mga hilit nga dapit mao nga pinangga sila sa mga tawo.

Dinhi sa dakbayan sa Sugbo, walay nagpabentaha nila ni kanhi Kongresista Tommy Osmeña ug Mayor Mike Rama kay pareho sila nga aktibo sa pagsuroy sa kabarangayan.

Pareho sila si Tommy ug Mike nga daghan og mga supporters. Isig paningkamot sila karon kon kinsa kanila ang suportahan sa mga senior citizens.

Sa programa sa usa ka radyo kagahapon, adunay babaye nga nanawag og miingon nga opisyal siya sa kahugpongan sa mga city scholars ug matud niya nga wala sila malimot nga ang city scholarship program gisugdan gyud ni Tommy kaniadto.

Apan dili gihapon angay'ng mokumpiyansa si Tommy niini kay si Mayor Rama maoy nagdumala karon sa City Scholarship Program.