Panamilit sa pabuto
Duna mi silingan nga nailhan nga usa sa tigpalit ug tigduslit sa labing mahalon ug mabulukon ug taas og lahutay nga mga pabuto sa pagsugat sa Pasko ug bag-ong tuig. Karong bag-o nakapalit siya og laing pinuy-anan sa laing dapit ug tagsa na lang namo siya nga igkita. Ang kaniadto hayag niyang bay karon mingaw ug ngiob na.
Human nitambong sa misa sa bag-ong tuig, nakit-an nakong labihang hayaga sa iyang bay ug gipalibotan sa nagparada nga mga sakyanan. Nalipay ko nga gipili niya ang iyang karaang bay nga maoy pahigayonan sa party uban sa iyang mga suod pagsugat sa bag-ong tuig.
***
Kay wa man kong katug dayon human nitambong sa party sa pamilya sa lain namong silingan, nakahukom kong magpaabot na lang sa mga pabuto sa pagsugat sa bag-ong tuig. Usa sa akong gipaabot kon sama ba gihapon kamabulukon ug kadugay mahuman ang mga pabuto nga giandam sa karaan namong silingan.
Apan usa ka oras sa wa pa ang tungang gabii nakit-an nako nga nanganaog silang tanan paingon sa ilang mga sakyanan, nagbitbit og mga butang gikan sa party, nanakay ug nag-iyahay pagpanggawas. Tingali nag-apas nga di pa kaayo daghan ang magpabuto sa kadalanan ug adto mosugat sa bag-ong tuig sa bag-o nilang pinuy-anan.
***
Way atop ang ibabaw nga bahin sa among bay maong bantang ang tanang pabuto sa tulo ka dakbayan sa Sugbo, Mandaue ug Lapu-Lapu ug kalungsoran sa amihanang Metro Cebu. Ganahan kong motan-aw apan di ganahang mamalit ug labaw nang talawan sa pagduslit. Maong sa makausa pa nagpasalamat sa hilom sa mga silingan nga isog ug di tihik.
Sa nangaging bag-ong tuig, nitadlas ang mga kuwitis sa among ibabaw ug mas duol ang mga silaob sa nagkalainlaing bulok ug kagahob. Apan sa niaging Enero 1 mas layo nang mga pabuto ug mas dali nang nahuman. Pagbaktas nako paingon sa trabaho nga kadlawon pang dako, mas gamay rang nagpasad nga mga papel sa pabuto.
***
Di among mga silingan ra ang nanamilit sa mga pabuto. Napamatud-an ni sa dakong pagtidlom sa halin sa mga pabuto ug sa mga nabuthan nga nada sa mga tambalanan. Huwaton ba nato nga makaamgo nang tanan nga may mas makahuloganon nga mga paagi, nga mas luwas kay sa mga pabuto, sa pagsugat sa bag-ong tuig?
O ipatuman nang sugyot ni Health Secretary Janette Garin nga ban sa mga pabuto sa 2017 ug gamiton ang usa ka tuig nga lugway sa pagpangita og alternatibong mga panginabuhi alang sa mga pamilya nga nagsalig sa industriya sa pabuto? Nidason dayon si Chief Superintendent Manuel Gaerlan, hepe sa Police Regional Office sa Central Visayas, kinsa nikumpisal nga ang legalisasyon wa makahimong luwas sa mga pabuto.
- Latest
