Dili gyud maayo nga magbinata ang mga kandidato sa mga tag-as nga puwesto sa kagamhanan. Posible man gud nga imbes nga ang mga botante ganahan kanila, basin adto na lang mobotar sa ubang kandidato unya.
Ang husto nga buhaton ni kanhi DILG Secretary Mar Roxas mao nga pasagdan ra gyud niya si Mayor Rodrigo Duterte nga mohimo'g mga balikas. Sa pagpakahilom ni Mar, mas modayeg pag-ayo ang katawhan kaniya ug yam-iran si Duterte.
Nakalitan man gud ang mga tawo kay si Roxas nga naila kaayo sa kapormal, misukol man og tinubagay kang Duterte. Kon magsige ang ilang tinubagay, sa akong paniid, makabentaha pag-ayo si Senador Grace Poe.
Timan-i nga daku ang rating ni Grace Poe ug dili imposible nga mosaka pa kini kun ang katawhan magsugod na pagpangyamiid kanila ni Duterte ug Mar.
Apan may panahon pa sa pag-usab. Basta kay alang kanako, kadtong gusto nga mahimong presidente angay'ng mopakita sa iyang kaligdong.
Unya, mitambong ko og party sa mga Insek dinhi sa Sugbo kaniadtong miaging gabii ug didto nako nahibaw-an nga sikat man diay si Senador Chiz Escudero sa ilang sektor.
Lahi diay sa ubang kandidato pagka bise presidente nga ang ilang kalihukan gipakita sa Facebook, si Chiz hilom lang nga misuroy sa lainlaing mga dapit ug nakigtagbo sa ilang mga lider sa politika.
Aw, ang tinuod lagi, suheto pa gani si Chiz kay kang Grace Poe kon unsaon pagdumala ang nasud.
***
Dili maayo ang gihimo ni Mayor Mike Rama nga nagsakay-sakay og PUJ unya kuhaan siya'g hulagway sa iya rang sakop aron i-post sa Facebook.
Mikuha man gud ko og baruganan niini sa katawhan ug nangyamiid na man hinuon ang uban kay drama kuno. Naa man go'y sakyanan ang mayor unya nganong mag-PUJ man gyud?
Apan sagdi lang, katungod man sab ni Mayor Mike nga mo-post sa Facebook kon siya gusto niini, apan para nako, dili gyud maayo kay ang uban mangyamiid na man hinuon.
Buyno, angay'ng himuon gihapon kini sa mayor kon mabalik na siya sa katungdanan. Unya, dili na niya gamiton ang siren sa iyang sakyanan kon mobiyahe. Sigurado ko nga maminaw niini ang mayor.
***
Daghang mga drayber og traysikol diha sa Mandaue nangahadlok tungod kay dili imposible nga kon si Luigi Quisumbing ang modaog, multicab na ang padaganon hulip sa mga traysikol.
Matud pa nga kini maoy natan-awan ni Luigi nga sulbad sa grabeng problema sa trapiko diha sa ubay-ubay'ng kadalanan sa Mandaue nga daghang traysikol nga nagbiyahe.
Base sa akong pakisusi gud, dul-an sa 3,000 ka traysikol ang nagbiyahe diha sa Mandaue. Puwerte gyud hinuon nga problemaha sa traffic diha sa Mandaue.
Unsaon gud nga wala pa kaayo ni pangitai og sulbad ni Mayor Jonas Cortes. Hapit na lang mahuman ang iyang termino, wala masulbad ang grabeng problema sa traffic.
Kay diha man gipahigayon ang party sa mga Chinese nga akong gitambongan, naniguro ko ug migikan duha ka oras sa wala pa ang pagsugod sa kalihukan.
***
Tinuod ba nga ang pagpanghatag sa Emergency Shelter Assistance (ESA) diha sa Daanbantayan gipahimuslan ug gigamit sa politika ni Mayor Agusto "Itok" Corro?
Kon tinuod man gani kining report, makaingon ko nga lain diay og batasan si Mayor Corro sa iyang igsuon nga mayor sa Lapu-Lapu City kay maayo man gyud nga pagka opisyal?
Ang pasangil mao nga kon ang biktima niadtong bagyong Yolanda dumadapig sa kontra sa mayor sa politika, dili kompleto ang ihatag. Kon tinuod man gani kini Mayor Itok, makaingon ko nga dili ka maayo nga mayor.
Mosamot nga kadtong mga pamilya sa tawo nga wala tabangi base sa husto unta nga kantidad, masuko ug dili na gyud hinuon mobotar nimo sa eleksyon.