Kuwarta sa basura

Para kanako, dili na lang hisgotan pa kining isyu nga nagpasangil nga mogamit og gidili nga drugas si Mayor Michael Rama.

Motuo ko nga may sakit lang sab si Mike ug mao nga miniwang pag-ayo. Ang nindot gyud sa politika mao ang paghisgot sa mga isyu kon giunsa sa mayor ang pagpadagan sa atong kagamhanan.

Duna may mga programa sa radyo nga gidumala og mga dumadapig gyud sa BOPK. Ang nindot nila nga idiskutir kon ngano nga mahal man ang bayad sa City Hall sa paglabay og basura didto sa landfill sa Consolacion?

Basin mao ni ang giingon nga adunay nakakuwarta sa basura sa mga opisyal diha sa City Hall? Dili ba?

***

Matud ni Davao City Mayor Rodrigo Duterte nga napugos siya paglansar pagka presidente kay supak gyud sa iyang buot nga ang Pilipinas makabaton og Amerikano nga presidente.

Klaro kaayo nga ang gipasabot ni Duterte mao si Senador Grace Poe-Llamanzares, kinsa misalikway sa iyang pagka Filipino ug mihural nga American citizen.

Sumala pa ni Duterte nga dili gyud tukma nga gideklarar nga natural born si Grace Poe. Bahala na kuno og laing tawo ang mapili nga president, basta dili lang ang anak ni Fernando Poe.

Kon imong sabton pag-ayo, nagtuo diay si Duterte nga mas bentaha pa si Grace Poe kay sa ubang kandidato pagka presidente sama nila ni Mar Roxas, Jejomar Binay, Miriam Santiago?

Dili pud tingali makabentaha si Poe sa ubang kandidato uy. Sama ni Roxas, suheto na kini kaayo pagdumala sa kagamhanan kay nahimo na nga kongresista, senador, ug secretary sa DTI, DILG ug DOTC.

Si Vice President Binay suheto sab kana sa pagpadagan sa kagamhanan, apan ang nakadaot lang kay nag-atubang og kaso nga pangurakot diha nga mayor pa siya sa Makati.

Sila si Binay ug Roxas maoy gitan-aw nga magtigi gyud sa pagka presidente. Nakabentaha lang si Roxas kay wala gyud siya malambigit og bisan unsa nga kurapsyon.

Husto ang uban nga nagtan-aw ni Grace Poe nga kuwang pa gyud og kasinatian pagdumala sa kagamhanan. Mas maayo pa gani ni Grace si Senador Chiz Escudero nga maoy iyang katandem pagka vice president.

Misugyot man gani ko nga mas nindot og si Chiz maoy nidagan pagka presidente ug si Grace Poe ang vice kay dili pa tingali gukdon sa iyang mga kontra ang iyang pagka Amerikano.

***

Kadaghan ba diay nga problema sa Mandaue City ang gusto lang biyaan ni Mayor Jonas Cortes. Gawas sa grabe nga traffic sa Mandaue, daghan diay nga mga lumolupyo sa Mandaue ang hilom nga nahiubos kaniya kay wala gyud tagda ang ilang mga guba nga puso artesyano.

Wala diay "Tubig Project Team" ang Mandaue City ubos ni Mayor Jonas? Nahuman na lang ang tulo ka termino ni Jonas, daghang mga puso ang wala na maatiman.

Unya karon, gusto na usab kini nga molansar pagka kongresista sa siksto distrito. Tukma gyud ang akong sugyot nga pag vice mayor na lang gyud Mayor Jonas ug atimana kanang mga problema nga wala pa nimo maatiman.

Suwerte na lang gani kay si Konsehal Lolypop Ouano nakasuroy sa lainlaing mga dapit ug mao na lang ang migasto sa pagpaayo sa mga puso aron kakuhaan og tubig sa mga tawo.

Daghan kaayo ang nagpasalamat ni Lolypop nga taga Barangay Centro ug Guizo kay sa kataposan naayo na gyud ang ilang puso nga dugay na nga naguba.

Husto gyud ang akong tambag nga may higayon ka pa Mayor Jonas nga magbaylo mo si Atty. Carlo Fortuna ug daganan. Si Carlo maoy angayan nga molansar sa kongreso kay usa ka abogado.

Kinsa gud ang makapilde ni Jonas kon ang pagka bise mayor maoy iyang daganan. Kon mag bise mayor si Jonas, makapadayon siya pagserbisyo sa Mandaue ug dili kay talikdan lang ang iyang mga palpak.