Pangandam sa Grand Halad
Sa makausa pa, uban sa padayong paghiusa sa manggihatagon nga mga Sugbuanon sa pagtabang sa labing nagkinahanglan, ipahigayon ang Grand Halad sa Kapamilya, ang labing dakong piyesta sa libreng mga pangalagad ning bahina sa nasud, tibuok adlaw karong Sabado, Nobyembre 28, 2015, sa Main Campus sa Cebu Technological University (CTU) sa M.J. Cuenco Ave. sa Dakbayan sa Sugbo.
Sama sa naandan, human sa pasiunang kabalaka nga pul-an nang katawhan sa pagtabang, kay kaduha baya matag tuig ming manuktok sa ilang kasingkasing, sa matag Hunyo ug matag Nobyembre matag tuig, karon nagkapuliki na mi sa pag-mapa sa kadaghan sa libreng mga pangalagad nga nagbaha tubag sa kabos ug mapangahasong kampanya nga among gilusad.
***
Nakigtagbo mi gahapon sa kadagkoan sa CTU aron paghingpit sa pangandam sa Grand Halad karong Sabado. Gipahibawo sa among coordinator nga si RC Dalaguit silang Main Campus Director Dr. Januario Flores Jr. ug Extension Services Dr. Greg Gamboa ug kaubanan sa kaliboan ug usa namo ka panginahanglan.
Salamat sa kamasinabuton sa kadagkoan sa CTU, wa silay balibad, Kutob sa mahimo, motabang gyod sila sa paghimo sa matag Grand Halad nga mas dako ug mas hapsay kay sa mga gisundan. Apan usa lang na sa mga hinungdan nganong ang CTU maoy gipahigayonan sa Grand Halad sud na sa daghan uyamot nga katuigan.
***
Ang nakahimo sa CTU nga labing madanihon nga pahigayonan sa Grand Halad mao ang iyang kaduol sa labing kabos nga mga molupyo sa naglibot nga mga barangay ug ang kasayon nga abton sa taga lagyo kay maagian sa hapit tanang ruta sa mga sakyanang pamasahero.
Human sa makalilisang nga linog niadtong Oktubre 2013, nga nakagusbat sa pipila ka classrooms sa main campus, nagtukod ang CTU og dinaliang classrooms sa ilang oval. Maong inay manghuwam og kapin sa gatos ka tents, nanghuwam na lang mi sa classrooms. Maong nanungog ang taga CTU nga ang Grand Halad maoy labing nakapahimus sa tinuyo nilang mga istruktura human sa linog.
***
Usa sa among suliran, ug palihug sabta nga giisip ni namo nga malipayong suliran, mao nga unsaon pagpahibawo ang taas nga kutay sa libreng mga pangalagad sa way pagsakripisyo sa naandan namong mga programa sa radyo ug telebisyon. Nahadlok ming kon magsige na lang mi og basa sa taas nga listahan, pul-an ang mga tigpaminaw ug maglibog na hinuon unsay ilang adtuon.
Maong nidangop mi sa bag-ong teknolohiya. Naghimo og online nga lista sa tanang libreng mga pangalagad, apil nang labing mapuslanon nga seminars, nga sayon rang matultolan ug makit-an dayon ang labing uwahing kausaban nga among gibutang. Mao ning minubo nga link, tinyurl.com/dyabhalad, ug palihug ipanabi sa labing nagkinahanglan natong mga Kapamilya.
- Latest
