Kalbaryo sa rehistrasyon
Way katungod ang Commission on Elections sa pagtulisok sa mga botante nga wa kaapas sa lugway pagpa-rehistro ug pagpa-biometrics alang sa piniliay sa Mayo 9, 2016. Di angayng mamasangil ang COMELEC sa mga botante nga tapolan ug langayan (bisan pipila tingali nila maigo) kay mahimong kasagaran sa mga nauwahi duna gyoy lehitimong mga sukaranan.
Di ko modupa sa mga nag-unya-unya lang hangtod nga nauwahi na gyod hinuon. Apan ang kalapad sa kakabos sa katawhan mahimong maoy nakababag sa pagbiya sa ilang panginabuhi. Lisod ning sabton sa mga may klarong walo ka oras nga trabaho ug makapahuway pa gyod sa weekends. Di tanang botante sama kaharuhay.
***
Inay mamekat sa mga botante angayng tun-an sa COMELEC unsaon pagpalambo ang sistema sa rehistrasyon. Kon automated nang usa ka bahin sa piniliay (mano-mano gihapon ang pagbotar apan PCOS machines nay moihap), nga ang iskutenyo nga niadtong maabtan og siyam-siyam ug mamatyan una og daghan karon mahingpit na sud lang sa pila ka takna, nganong wa pa mang kapatuman ang COMELEC og mas sayon nga mga paagi paglista sa mga botante?
Bisan kapila pa balikbalika sa COMELEC nga usa ug tunga ka tuig ang lugway sa rehistrasyon, di malimod nga wa kinahanglana ang kalisod ug kakuti sa proseso nga ilang gipahamtang sa mga botante.
***
Tuguting tukion nako ang panginahanglan sa biometrics. Gisublisubli pagpasabot sa kadagkoan sa COMELEC nga gikinahanglan ang biometrics aron paglimpiyo sa listahan sa mga botante. Naneguro sila nga sa labing unang higayon sa piniliay sunod tuig hingpit nang mabadlong ang flying voters.
Apan apil sa naigo sa biometrics ang mga botante nga way palta sa pag-apil sa matag usa sa nangaging mga piniliay. Bugtong nilang atraso mao nga rehistrado na silang daan sa wa pang kahunahuna ang COMELEC pagpamalit og computers ug data capturing machines. Makiangayon ba na sila karon ang gisilotan sa kapakyas sa COMELEC pagpanalipod sa kaligdong sa listahan sa mga botante?
***
Di magnihit ang COMELEC og kasundan sa pag-iban sa kalbaryo sa pagparehistro. Ang kanasuran nga mao unta’y gikopyahan sa teknolohiya sa PCOS hagbay rang nagtanyag og nagkalainlaing mga sistema sa way hunong nga rehistrasyon, 24 oras matag adlaw ug 365 ka adlaw matag tuig.
Kahon ray imong suwatan ug marehistro na isip botante sa pagpa-ospital, pagpanrabaho, pagpalit og sakyanan, o pagbalhin og pinuy-anan. May mga estado na sa US nga nagtanyag og rehistrasyon online o pinaai sa koreyo. Gani, may mga estado na sab nga motugot og rehistrasyon sa ilang mga presinto sa adlaw sa piniliay. Bisan sa kasayon may mga botante gihapong nagdumili pagparehistro. Kay kabahin sa demokrasya ang katungod sa di pagpanginlabot. Nga mahimong maoy rason sa pipilang wa magpalista hangtod niadtong Sabado.
- Latest
