Pabor g'yud kaayo ko nga balikan sa paghatag og "pork barrel" ang mga magbabalaod, apan kinahanglan nga tinud-on usab sa kagamhanan ang paggukod niadtong mga makahimo og pagpangilkil sa kuwarta sa kagamhanan.
Kadaghanan sa mga magbabalaod, wala man mibulsa sa ilang Priority Development Assistance Fund. Gani ang foundation sa mga sakop sa media dinhi sa Sugbo gihatagan man og tipik sa PDAF ni Kongresista Raul del Mar.
Tungod niini, kon adunay mga sakop sa media nga ma-admit sa ospital ug kadtong adunay maintenance drugs and medicines, mahimo nga hatagan og tabang nga makakuha og tambal.
Apan tungod sa binuang sa ubang mga magbabalaod, apektado ang PDAF sa ubang kongresista nga nagtinarong, sama ni Del Mar.
Kini maoy rason nga dili g'yud ko malipay nga maghuna-huna sa mga magbabalaod nga adunay PDAF nga gikuwestyon sa Commission on Audit kay daghan intawon nga mga kabus ang apektado sa ilang kahakog sa kuwarta.
* * *
Dinhi sa Sugbo, si Kongresista Luigi Quisumbing (6thcongressional district) angay nga mohatag og katin-awan kon ngano nga ang P3 milyones sa iyang PDAF nahipunta man sa usa ka foundation nga kwestyonable.
Matud sa COA nga ang P3 milyones nga PDAF ni Kongresista Quisumbing nalakip sa P670 milyones nga PDAF sa 49 ka magbabalaod nga gikuwestyon tungod kay ang mga Non-Government Organizations nga gihatagan walay klaro.
Ang COA miingon nga ang Sinag ng Kaunlaran at Pagasa Foundation nga gihatagan sa P3 milyones nga PDAF ni Quisumbing maisip nga kuwestyonable kay walo pa lang kini ka buwan gikan sa iyang pagkamugna diha nga gihatagan sa mao nga kantidad.
Wala pa g'yuy mapakita nga kasinatian ang Sinag ng Kaunlaran at Pag-asa Foundation nga kahanas sa pagpatuman og mga proyekto nga gusto nila nga mugnaon. Ang budget gipaagi kini sa National Commission on Muslim Filipinos (NCMF), aron katabangan unta ang mga igsoon nato nga Muslim.
Busa angay g'yud nga itataw ni Quisumbing kini nga isyu kay ang kadagkoan sa NCMF mitataw ngadto sa COA nga ang mga NGO nga nahatagan sa PDAF alang sa proyekto girekomendar sa mga magbabalaod.
Unya karon, abi kay may isyu man siya nga giatubang sa PDAF, mihukom na lang si Quisumbing nga modagan na lang pagka mayor sa Mandaue. Usa kini si Quisumbing nga napugos ang kagamhanan nga undangon na ang PDAF ug daghan intawon ang apektado.
Dinhi sa dakbayan sa Sugbo, ug bisan sa ubang distrito, ang mga kongresista adunay medical program nga ang mga lumulopyo nga sakop sa ilang distrito maka-avail og health benefits gikan sa tagsa-tagsa nila ka PDAF.
* * *
Sa forum nga gipasiugdahan sa Philippine Chamber of Commerce and Industry (PCCI) didto sa kaulohan alang sa mga kandidato sa pagka presidente, nasuta nga mura'g mitalaw si Vice President Jejomar Binay nga dungan niya nga ikaatubang ang ubang kandidato.
Gusto unta ni Binay nga tagsa-tagsa lang sila nga moatubang sa mga opisyal sa dako'ng kahugpongan sa mga magpapatigayon. Nahadlok tingali si Binay kay basin og ang hisgotan mao ang isyu sa pasangil nga nakahimo siya og graft and corruption pinaagi sa pagpa-overprice sa katukoran sa Makati City parking building.
Ang report sa mga tigbalita sa Manila, nabentahaan kuno ni Mar Roxas sila si Grace Poe, Miriam Santiago ug si Binay sa punto nga pagpanubag sa mga pangutana.
Dili na ko mahibulong pa kon si Mar suheto sa mga isyu sa atong nasud.
Unya, sa mao nga forum, si Miriam kuno kay nagpa-cute ngadto sa mga negosyante. Dunay negosyante nga mitug-an sa mga tigbalita nga mi-walk-out siya kay iyang gihulagway nga "garbage" ang mga gibatbat ni Miriam sa iyang diskurso.
Aw, kay hapit na man g'yud ang kampanya sa mga nasudnong kandidato, makita unya nato nga iya-iya ang estelo nila sa pagpanubag sa pangutana. Apan ang tan-awon nato kon kinsa ang sinsero kanila ug nga makatuman sa ilang ipanulti.
Balikon nako, dili gayud kita mopili og kandidato nga "corrupt" ug dili maayo moserbisyo para sa katawhan.