Usa sa mga pasalig ni Cebu City Mayor Mike Rama sa pagsumiter sa iyang certificate of candidacy sa niaging semana mao nga tangtangon niya ang tanang campaign materials nga ipakatap sa nagkalainlaing bahin sa dakbayan. Nipasidaan siya nga way pilion ang hiningusgang kampanya batok sa naandan nga mga sagbot sa politika, bisan ang mga magpapili ubos sa iyang pundok, ang Team Rama.
Mao nga labihang kuganga sa mga molupyo sa Bulacao, Cebu City dihang nakit-an nila ang gibitay nga tarpaulin nga may letrato ni Rama ug sa tanan niyang kaubang magpapili sa habagatang distrito nga nagpahalipay sa piyesta sa St. Jude Acres Subdivision karong Oktubre 28.
***
Hinaot nga way pagtugot ni Rama ang pagbitay sa tarp nga klarong kalapasan sa iyang kampanya. Hinaot nga karong nabutyag ni sa publiko di siya maglangan sa pagpatangtang dayon ning sagbot nga hinimo sa iyang mga sakop. Hinaot nga iyang pamatud-an nga di pagarpar lang ang saad sa pagpanlimpiyo sa dakbayan gikan sa grabeng kahugaw sa kampanya.
Nakadawat ko og mga taho nga namuwak na sang campaign materials sa pipila ka barangay sa dakbayan. Nga nagbansiwag ang mga ngan ug mga nawong sa mga magpapili ubos sa Bando Osmeña Pundok Kauswagan ug Team Rama. Di tingali maayong pasagdan si Rama nga mao ray manglimpiyo.
***
Nadasig ko sa pagpangambisyon nga kamenosan kon di man hingpit nga kalikayan ang pagkaputos sa tibuok natong palibot sa campaign materials sa init nga reaksiyon sa publiko sa akong gi-post sa Facebook nga hulagway sa mayor ug bise mayor sa Consolacion sa tarp nga gibitay sa skywalk aron pagpahalipay sa piyesta ni San Narciso.
Mahimo pang mas epektibo ang kampanya kon ang mga utok sa paghugaw-hugaw maoy atong kampanyahan? Madutlan kaha og uwaw ang mga politiko kon magpakabana ang igong gidaghanon sa mga botante pagbisto ug pag-dokumento sa patuyang nila og pamilit sa propaganda materials?
***
Mangahas ko pagsugyot og eksperimento. Gamiton natong kamera sa atong mobile phones sa pagdokumento sa kalapasan sa mga politiko ug mga partido ug ang social media ug tradisyonal nga media aron pagpahibawo sa mga politiko nga nakahibawo ta ug wa makauyon sa ilang pangabuso.
Mahimong maghimo ta og Facebook page nga katingban og upload sa tanang makuhang mga letrato. Mahimong isumpay sa Twitter ug ubang social media. Mahimo sang mag-text ug manawag sa kinaham nga mga sibyaanan sa radyo ug telebisyon ug mga pamantalaan pagpakatap sa atong na-dokumento nga kahiwian. Way balaod batok sa premature campaigning apan may lagda batok sa paghugaw-hugaw. Labaw sa tanan, may katungod tang mga botante sa pag-insistir tumanon sa mga magpapili ang mga lagda di lang sa makiangayong kampanya kon dili sa kinatibuk-ang kaligdong.