Nipasidaan si Cebu City Mayor Mike Rama og dugang mga protesta batok sa mga konsehal nga nibabag sa iyang gisumiter nga supplemental budget. Matod ni Rama di siya mohunong hangtod nga mapugos ang mga sakop sa Bando Osmeña Pundok Kauswagan sa pagtuman sa ilang gimbuhaton. Nagdumili hinuon si Rama pagbutyag sa mosunod nilang mga lakang.
Sa iyang bahin, si Konsehal Gerry Carillo nirekomendar nga hinayunon nang Rama ang pagpasaka og mga kaso batok sa mayoriya sa City Council. Wa isalikway ni Carillo ang kahigayonan sa pagdangop sa iyang gitawag nga extra-legal measures aron mapasar ang dugang gahin ginamit ang halin sa mga luna sa South Road Properties.
***
Sa pikas nga bahin, nitumaw sab ang mga pagsaway sa protesta sa tugkaran sa City Hall niadtong Miyerkules. Gawas sa kalapasan sa mga lagda sa Civil Service Commission, giisa sa pipila ang kahigayonan sa pagpasaka og kasong kriminal batok sa mga tigpasiugda ug mga nangapil sa protesta.
Matod sa CSC mahimong pasakaan sila og kasong administratiba kon mapamatud-an nga nahunong o nahasol ang pangalagad sa publiko sa mga departamento sa City Hall ug kabaranggayan. Bakikaw hinuon ang awhag sa CSC nga ang kadagkoan sa City Hall maoy mokiha. Kay silang Rama ug department heads man maoy gipasanginlan nga mga tigpasiugda.
***
Wa hinuon mobilib si kanhi Mayor Tommy Osmeña sa kadaghan sa mga nangapil sa protesta. Nipasangil siya nga kasagaran sa mga nangapil mao ang job order employees nga way trabaho sa City Hall apan nagsige na og pangampanya sa kabaranggayan alang sa Team Rama, labi nang Carillo.
Nangangkon si Osmeña nga may mga dokumento siyang momatuod nga ang gahin sa disaster management maoy gigamit pagsuweldo sa mga nangampanya alang ni Carillo sa habagatang distrito. Matod ni Osmeña naapil sab sa protesta ang mga kawani sa kabaranggayan nga giilad nga igo lang silang motambong og mga tigom sa City Hall.
***
Gihagit ni Rama ang CSC sa pagpasaka og mga kaso batok nila. Matod niya gawasnon ang pag-apil sa mga kawani sa City Hall nga igo lang naningil sa nalangay nilang mga benepisyo ug sa mga kawani sa kabaranggay an nga igo lang nag-apura sa nalangay nilang mga proyekto. Nipasabot si Rama nga ang kadinalian sa kawsa maoy nakaaghat nila pagprotesta bisan atol sa mga takna nga tingtrabaho.
Gitataw sang Carillo nga mas taas ang katungod pagprotesta alang sa giyatakang tawhanong katungod. Gipahinumdoman ni Rama ang iyang mga kaatbang nga igo lang niyang gipanalipdan ang interes sa katawhan. Apan ang mga nahasol sa protesta nisumbalik ni Rama nga mas daghan ang naligsan sa pagbiya sa trabaho sa mga kawani nga mahimong nahudlat lang sa paglista sa ilang mga ngan.