Pipila ka paniid sa labing uwahing survey sa Pulse Asia (nga gihimo niadtong Septiyembre 8-14, 2015) sa posibleng mga piliunon pagka presidente:
• Nitidlom ang rating ni Senador Grace Poe ngadto sa 26% gikan sa 30% niadtong Hunyo apan nagpabilin siyang nag-una sa tanang nangambisyon sa 2016;
• Nadoble ang rating ni kanhi DILG Secretary Mar Roxas ngadto sa 20% gikan sa 10% niadtong Hunyo ug naapsan na si Bise Presidente Jejomar Binay sa ikaduhang dapit;
• Padayong nitidlom ang rating ni Binay ngadto sa 19% gikan sa 22% niadtong Hunyo; ug
•Nisaka ang rating ni Davao City Mayor Duterte ngadto sa 16% gikan sa 15% niadtong Hunyo.
***
Ang 4% nga pagtidlom sa rating ni Poe nisunod sa kontrobersiyal niyang pagdapig sa protesta sa Iglesia ni Cristo nga nakahasol sa minilyon ka motorista ug pasahero sa Metro Manila ug sa pagpasaka sa petisyon nga nagkuwestiyon sa iyang citizenship atubangan sa Senate Electoral Tribunal (SET). Ang 3% nga pagtidlom sa rating ni Binay nisunod sab sa iyang pagdapig sa INC ug sa mga pasangil sa kahiwian batok niya.
Ang 1% nga pagsaka sa rating ni Duterte human sa iyang pahibawo nga di modayon pagdagan pagka presidente mahimong maoy panghawid sa iyang mga dumadapig nga nakumbinser nga siya ang labing takos sa tanang magpapili ug mahimong mao say nakapabanhaw sa iyang padugang og pusta.
***
Apan ang labing dakong sugilanon iya ni Roxas. Ang 10% nga pagburot sa iyang rating nisunod sa opisyal nang pagdeklarar ni Presidente Noynoy Aquino niya isip opisyal nga kandidato sa administrasyon. Mahimong kabahin sa nadugang niya ang mga dumadapig ni Poe nga naglaom untang mag-pares sila.
Mahimong naadto sang Roxas ang mga dumadapig nilang Poe ug Binay nga nakumbinser nga igo lang nilang giulog-ulogan ang INC aron pagkuha sa nabantog nilang bloc voting sa Mayo sunod tuig. Si Roxas sab ang labing nakapahimus sa pagsulbong sa popularidad ni Aquino nga nakabawi na sa trahedya sa Mamasapano, Maguindanao.
***
Sa way pagpadayag og kaalarma sa nagkagamay niyang labaw batok nilang Roxas ug Binay, gipahibawo ni Poe ang iyang plano sa paglibot sa nagkalainlaing bahin sa nasud aron makit-an ug madunggan siya sa mas daghan ug mas modako pa ang gintang tali niya ug sa iyang mga kaatbang.
Ang angay nga maalarma mao si Binay. Human nipasalig nga di na maibanan ang iyang core group nga 35%, bisan sa daghan uyamot nga pagsaway, karon nitidlom na ubos sa 20% ang iyang popularidad. Nakapait mao nga ang iyang pagtibugsok nagpadayon human sa iyang True State of the Nation Address kanus-a gisaway niya ang pamunoang Aquino nga tapolan, langayan, utrong kawatan ug way bisan gamayng pagbati sa labing kabos sa katawhang Pilipinhon.