Pagpukaw sa Catholic Vote

Kun ma-senador si Justice Secretary Leila de Lima, ang Iglesia ni Cristo ang usa sa angay niyang pasalamatan. Kay nisulbong pag-ayo ang iyang popularidad human nagprotesta ang INC sa iyang pagdawat sa kasong kriminal nga gipasaka sa gipalagpot nga ministro batok sa mga tagduma sa relihiyusong kahugpongan.

Di hinuon kataposan sa kalibotan alang sa INC ang paglingkod ni de Lima sa Senado. Kay di mahimong gamiton ni de Lima ang Senado sa pagpapriso sa tanang sakop sa Sanggunian nga, segun sa mga sinumbong, hingpit nga makapa-inutil sa ilang simbahan. Samang way garantiya nga mapasaka sa korte ang kaso ni kanhi ministro Isaias Samson Jr. tungod lang kay gidawat ni de Lima.

* * *

Sa laktod, wa gyod unta kinahanglana ang protesta sa INC. Apan nganong ila man tong gihimo? Nanghudlat ba lang daan simbako way nakahunghong ni de Lima unsa kalig-on ang ilang pundok? O nakahukom na gyong liderato pagpaundayon sa ilang nasugdan nga paggamit sa matag kahigayonan pagpakita sa ilang braso?

Nga gikuwestiyon sa inahan ug mga igsuon ni INC Executive Minister Eduardo Manalo. Samtang gipasumbingay rang ilang politikanhong influencia sa iyang apohang Felix ug amahang Erano, si Eduardo mas agresibo. Maong nabantang ang malampusong pagduso sa ilang mga sakop sa tag-as nga katungdanan sa gobyerno ug ang nabulilyasong pagdupa sa napalagpot nga si kanhi chief justice Renato Corona.

* * *

Ang leksiyon nga nakat-onan ni Senador Grace Poe mao nga samtang importante ang pagkuha sa suporta sa INC makadaot sa iyang kinatibuk-ang pamolitika ang pagpanalipod sa ilang protesta nga nakahasol pag-ayo sa mas daghang botante nga di sakop sa INC.

Si Bise Presidente Jejomar Binay, nga sama ni Poe niulog-ulog sa INC, nakakita og kahigayonan pag-insulto sa iyang mga dumadapig nga lunod-patay na sila niya bisan unsa pay bag-ong mga pasangil sa iyang mga kaatbang. Ang konsuylo lang ni Binay mao nga kon sama kaubos ang pangisip sa iyang mga dumadapig suma sa iyang panglantaw wa siyay angay’ng kabalak-an kay di sila mainsulto.

* * *

Inay mobalik sa mga pasumbingay mahimong mas kusganon pang moduso sa ilang mga sentimento ang kadagkoan sa INC bisan sa pagsulbong ni de Lima. Di lang aron paghiusa sa ilang mga sakop pagbotar isip usa sa piniliay sa Mayo 2016 kon dili aron mabaraw ang mga naghunahuna pagsunod sa mga sakop sa Pamilyang Manalo nga nibisto sa mga kaso sa pangurakot ug pangabuso sa gahom.

Napamatud-an sa nangaging piniliay nga way Catholic Vote. Gawas nga way kamandoan ang Catholic Bishops Conference of the Philippines (CBCP), gisalikway sa mga Katoliko ang mga kandidato sa pipila ka kaparian. Mahimo hinuong mapukaw ang ilang panaghiusa kon may sabaang minoriya nga manganti nga silay magbuot kinsay sunod nga presidente.

[email protected]