Hinaot mag-abot sila
Diriyot na sab mag-abot silang Cebu City Mayor Mike Rama ug kanhi Mayor Tommy Osmeña sa media forum sa Kapisanan ng mga Brodkaster ng Pilipinas Cebu Chapter mahitungod sa mga lagda sa political advertisements sa piniliay sa Mayo sunod tuig. Kabahin ang kalihokan sa kasaulogan sa Press Freedom Week karong semanaha ug sa Broadcasters Month tibuok Septiyembre.
Si kanhi KBP Cebu chairman Jun Tagalog maoy nangimbitar sa resource persons. Sa bisperas sa forum, gipahibawo ko niya nga nidawat sa imbitasyon si Rama apan nibalibad si Cebu Governor Junjun Davide. Dihang nitambong sa Arangkada sa DYAB Abante Pa, Bisaya! si Osmeña sa adlaw sa forum, nananghid kong Jun mahimo bang ako siyang dapiton.
***
Nipadayag si Osmeña og panagana nga motambong siya sa kalihokan uban ni Rama nga way klarong imbitasyon. Ako siyang gipasaligan nga gawas nga nisugot nang kadagkoan sa KBP, nagtuo kong dako siya og ikatampo tungod sa lapad niyang kasinatian sa political ads sa radyo, telebisyon ug pamantalaan.
Nitubag si Osmeña nga iyang tan-awon. Dayong tapos sa among interview, niingon siyang mopauli una sa ilang bay sa Guadalupe ug busa mahimong di makatambong tungod sa kalayo sa Marcelo Fernan Press Center. Ako siyang gipahibawo nga kutob sa udto ang forum ug mahimong makaabot pa siya. Niingon si Osmeña nga iyang suwayan.
***
Nagsugod nang forum pag-abot ni Rama. Ako dayon siyang giingnan nga mahimong motambong si Osmeña. Gipasaligan nako siya nga wa mi tuyo pagsabong nila kay isentro ang diskusyon sa ilang kasinatian ug mga panglantaw sa political ads.
Sa tungatunga sa forum, namalihug kong Edison delos Angeles sa DYAB Radyo Patrol pagsusi nagpadung na ba si Osmeña. Matod ni Edison, nibalibad si Osmeña kay di kabiya sa daghan niyang bisita sa bay. Saksi sab si Edison sa wa pagkahinayon sa panag-abot nilang Rama ug Osmeña sa niaging buwan atol sa forum sa political dynasty sa University of San Carlos. Niadtong higayona si Rama ang wa mopakita.
***
Anugon. Apan padayon ming maningkamot nga mag-abot sila. Di aron mag-away kon dili aron kahatagan ang mga Sugbuanon sa kahigayonan pagtan-aw ug pagpaminaw ang ilang mga plano sa pagpalambo sa Sugbo ug ang managlahi nga estilo sa ilang liderato sa usa ka dapit ug higayon.
Di sila kinahanglan nga maglalis. Mahimong manubag lang og managsamang mga pangutana sa labing mahinungdanong mga kontrobersiya nga giatubang sa dakbayan karon. Human sa taas nang tinubagay, naklaro na hinuon ang managlahi nilang panglantaw sa South Road Properties, Cebu City Medical Center, flyovers ug uban pa. Apan mas maayo gihapong mag-abot sila. Aron di nang kabalibad ang mga botante nga wa silang kasabot sa mga sukaranan sa ilang panagsungi.
- Latest
