Tulo ka oras nga baktas
Gorordo Ave., Cebu City -- Kon mapatuman ni Mayor Mike Rama ang iyang plano, maguba ang habog nga koral sa simbahan sa mga Mormons, ang kabahin sa luho nga restaurant sa mga Lhuillier ug ubang bay patigayon ug pribadong mga pinuy-anan dinhi ug sa ubang kadalanan sa dakbayan. Nunot ni sa iyang kampanya pagkuha pagbalik sa sidewalk alang sa katawhan.
Maigo sa kampanya ni Rama ang labing dagkong negosyante, nga ang uban mahimong nakatampo sa iyang kampanya, ug sa labing kabos nga kabalayan, nga ang mga molupyo mahimong kabahin sa lunod-patay niyang mga dumadapig. Apan gitataw ni Rama ang iyang determinasyon. Ug giapura ang iyang mga sinaligan pagpatuman sa iyang sugo.
* * *
Labing bantang nga gitumbok ni Rama nga nakapahuot sa trapiko dinhi ug kasilinganang kadalanan, gawas nga nakapa-peligro sa manglakaw nga katawhan, mao ang The Cebu Philippines Temple of The Church of Jesus Christ of Latter-day Saints. Gisuwatan nang Rama ang lokal nga kadagkoan sa simbahan ug gipahibawo sa dako nilang kalapasan.
Apan ang iyang suwat gisang-at pa sa ilang world headquarters sa Main St. sa Salt Lake City sa Utah sa Estados Unidos. Nagtinguha si Rama pagkumbinser sa simbahan nga dinalian ang panginahanglan pag-uli sa sidewalk nga ilang gihikaw sa mga Sugbuanon. Ug nga di mahimong unya-unyaon lang.
* * *
Nagpaabot si Rama nga mas sayon ang pagbungkag sa kabahin sa La Vie Parisienne, ang luho nga bakery ug tindahan sa negosyanteng si Michel Lhuillier, ug ubang pribadong mga negosyo. Matod ni Rama ang kaso nilang Lhuillier ug sa Mormons nagmatuod nga ang pagpangyatak sa balaod di monopoliya sa mga kabos.
Masaligon si Rama nga makasabot ang mga kabos, nga naglakip sa beneficiaries sa kontrobersiyal nga Provincial Ordinance 93-1, nga di mahimong magpadayon pagpatong ang ilang kabalayan sa sidewalk. Nipasidaan siya nga di niya pasagdan ang pipila ka urban poor groups nga mahimong mo-organisar ug mohulhog sa mga molupyo batok sa iyang kampanya alang sa ilang pamolitika.
* * *
Nikumpisal hinuon si Rama human sa kapin sa tulo ka oras namong baktas gahapon sa buntag nga di tanang plano mapatuman. Pananglitan, tulo ka metro nga setback ang iyang giawhag sa Technical Education and Skills Development Authority apan duha ka metro ray gihatag ni Direktor Heneral Joel Villanueva.
Niangkon sab nga kutob ra siya sa pagsaway sa duha ka proyekto ni Kongresista Raul del Mar, ang skywalk dinhi nga nibabag sa sidewalk ug ang flyover sa Bantal nga nipahiyos sa upat ka lane nga highway ngadto sa duha na lang ka lane. Gitataw hinuong Rama nga hingpiton ang kampanya sa labing daling panahon. Gipasidan-an ang iyang mga sinaligan nga mahimong wa siyay ikatulong termino kon di matuman ang mga pasalig sa iyang ikaduhang termino.
- Latest
