Pag-atiman sa mga bata

Sayop ang pamalibad sa mga gobernador, mayor ug ubang lokal nga mga opisyal nga di nila mapatuman ang Juvenile Justice and Welfare Act (Republic Act. No. 9344), ang kontrobersiyal nga balaod nga nagdili sa pagpriso sa mga bata nga makahimo og krimen ug busa angayng ipaubos sa rehabilitation, kay way pundo gikan sa nasudnong gobyerno.

Gimandoan sa balaod ang matag lalawigan, dakbayan, lungsod ug barangay paggahin og 1% sa ilang internal revenue allotment alang sa mga programa sa kabataan. Sa ato pa, di ang kakuwang sa kuwarta kon dili ang kakuwang sa pagpakabana ang hinungdan nga napasagdan ang nagkadaghan nga kabataan sa kadalanan.

***

Ang Dakbayan sa Sugbo nga maoy labing daghan og kabataan sa kadalanan di lang sa Metro Cebu kon dili sa tibuok Central Visayas dunay tinuig nga bahin sa IRA nga P1.2 bilyones. Kon tumanon ang balaod angayng mogahin ang dakbayan og labing menos P12 milyones matag tuig alang sa kabataan.

Ang Lalawigan sa Sugbo may tinuig nga bahin sa IRA nga P2 bilyones. Sa ato pa, angay unta nga mogahin ang Kapitolyo og labing menos P20 milyones sa mga programa ug mga proyekto alang sa kabataan. Ambot diin gastohang kuwarta ug nganong hangtod karon mamalibad ang lokal nga mga opisyal nga way kapahimutangan sa mga bata nga gipasanginlang nakalapas sa balaod.

***

Gimandoan sa balaod ang gobernador, mayor ug barangay kapitan nga mangu sa Local Council for the Protection of Children nga sakpan sa board member o konsehal nga pangu sa committee on women and family; representante sa Department of Interior and Local Government; Social Welfare and Development Officer; Labor and Employment Officer;

Opisyal sa Department of Education (DepEd), Planning & Development Officer; Budget Officer; Health Officer; Nutrition Officer; opisyal sa Philippine National Police  ug Armed Forces of the Philippines; Treasurer; pangu sa Sangguniang Kabataan; pangu sa Parents Teachers Association; representante sa kabataan ug mga representante sa non-government organizations.

***

Di sab tinuod ang pangangkon sa kapolisan ug lokal nga mga opisyal nga di kasilotan ang mga bata nga makahimo og krimen. Gimandoan sa balaod ang lokal nga mga opisyal, kapolisan ug korte pagpahamtang sa mosunod nga mga sentensiya: Pag-uli sa kabtangan; pagbayad sa kadaot; pagpangayo og pasaylo; pagmaymay sa bata ug sa iyang pamilya; pagserbisyo sa katilingban; pagsakmit sa bunga o sangkap sa krimen; kasaba o multa; o pagkatanggong sa mga institusyon:

• Youth Detention Home nga ubos sa pagduma sa LGUs o NGOs ug maoy pahimutangan sa mga bata kansang mga kaso gihusay pa sa korte; ug

• Youth Rehabilitation Center diin atimanon ang mga bata nga nasentensiyahan na aron               mahibalik sa ilang mga pamilya ug katilingban.

[email protected]