Sentido kumon sa dan
Nangayo og pasaylo si Joy Tumulak, operations chief sa Cebu City Transportation Office, sa kapakyas nila sa pagpugong ug sa pagsulbad dayon sa pagkabara sa trapiko sa South Coastal Road sa South Road Properties niadtong Sabado sa gabii. Matod niya mga tawo ra ang ilang traffic enforcers nga gipangkapoy sab human sa subsob nilang pagbantay sa mga ruta sa mga delegado sa Asia Pacific Economic Cooperation.
Matod ni Tumulak usa siya sa nayayay sa kakapoy sa APEC. Gituyo pagpawong ang iyang radyo aron hingpit nga makapahuway. Matod niya wa sab gyoy nanawag ni nag-text niya mahitungod sa grabeng pagkabara sa trapiko sa SRP.
* * *
Nikumpisal si Tumulak atol sa Arangkada sa DYAB Abante Pa, Bisaya! nga wa nila paabota nga magpunsisok ang mas daghang sakyanan nga nipasamot sa pagkamang sa trapiko sa SRP tungod sa panagdungan sa mosunod nga kalihokan (nga gawas sa mga aksidente, ang CCTO nakaapil sa pagtugot):
• Color Manila Blacklight Run nga nipasera sa seaside lane sa SCR;
• Disco duol sa Sugbu building sa SRP;
• Prosesyon sa Our Lady of Consolacion sa Basilica Minore del Sto. Niño nga nakaapektar sa baba sa SCR; ug
• Nagkadungan nga aksidente sa mga sakyanan sa viaduct sa SRP ug sa access road sa Mambaling.
* * *
Gitun-an na ron sa CCTO unsay mga silot nga ilang ikapahamtang batok sa mga tigpasiugda sa lumba sa dagan nga gihulagway bisan sa nangapil nga runners nga lunlon kiat-kiat ug way bisan unsang mapuslanon nga kawsa. Karon pa lang, may duha na ka posibleng kalapsan nga nakit-an si Tumulak:
• Una, ang kapakyas paghimo og subsob nga pahibawo sa publiko pinaagi sa media sa pagtak-op sa seaside lane sa SCR; ug
• Ikaduha, ang kapakyas pagbutang og klarong traffic advisory sa masig ka tumoy sa SCR (bugtong nakit-an ni Tumulak mao ang gamay nga tarpaulin nga lugos pa gyod mabasa ang font sa nagdagan nga mga motorista ug mga pasahero).
* * *
Bisan ang CCTO wa kaluwat og pasidaan sa pagsera sa dan. Way traffic enforcer nga nakahunahuna nganong gitak-opan nang dan sa alas-5:30 sa hapon, tulo ka oras sa wa pang aktuwal nga pagsugod sa lumba sa dagan. Wa say bisan usa nilang nakada og buot nga di na lang pasudlan og dugang sakyanan gikan sa Talisay City ug Plaza Independencia ug pasimangon na lang sa mas luag nga Natalio Bacalso Avenue dihang nagkamang na ang trapiko.
Pipila sa natanggong nga mga motorista nagplano pagkiha sa mga tigpasiugda pagpaningil sa minilyon ka pesos nga kadaot nga namugna sa ilang binuang. Mga sakop sa CCTO Board niangkon nga angayng sublion ang mga lagda nga nipasayun-sayon lang pagsera sa kadalanan sa bisan unsang katuyoan.
- Latest
