Dili tukma ang lakang sa mga sakop sa Iglesia Ni Cristo nga mohimo sila og protesta batok sa kagamhanan tungod lang kay gitagad sa Department of Justice ang kaso nga gipasaka batok sa pipila nila ka ministro.
Unta, ang mga mabuot nga sakop sa INC, ilabi na kadtong ania sa Sugbo, dili basta-basta nga motuman sa kamandoan sa ilang labaw ug timbang-timbangon nila pag-ayo ang isyu.
Dili tinuod nga gilapas sa kagamhanan ang lagda sa Konstitusyon kabahin sa Separation of Church and State abi kay imbestigahon sa DOJ ang gipasaka nga reklamo batok sa pipila nila ka ministro.
Kinsa man diay ang moimbestigar sa ilang mga sakop nga gipasanginlan nga nakahimo og kalapasan sa balaod nga gilatid sa Revised Penal Code?
Ang mga Katoliko ug ang ubang reliheyon, kang kansang mga sakop mapasakaan usab og kaso, mireklamo ba gud nga giimbestigar sa DOJ pinaagi sa piskaliya ang reklamo batok kanila?
Sa akong tan-aw, kun daginoton gani pag-ayo, mas kalapasan pa man gani sa giingon nga Separation of Church and State ang pagsalmot sa INC diin aktibo sila nga moawhag sa ilang mga sakop nga botohan ang kandidato nga magustohan nila atol sa eleksyon.
Tabla ra nga gikuhaan nila og katungod ang ilang mga sakop nga maoy magbuot kun kinsa ang ilang magustohan kay ang mga lider ra man sa INC ang magbuot.
Ang maayo nga buhaton sa INC mao nga pasagdan ra ang DOJ nga moimbestigar sa reklamo batok sa pipila nila ka ministro. Dili usab tukma nga ipakatap nila ang mga sayop nga inpormasyon nga ang DOJ miisyu na og kamandoan nga dakpon ang ilang lider mao nga sila magprotesta.
Alang sa mga wala masayod sa balaod, dili ang DOJ maoy moisyu og warrant of arrest. Ang DOJ, pinaagi sa piskaliya, igo lang mopasaka sa "information" sa hukmanan ug ang huwes na ang moisyu og warrant of arrest.
***
Kanunay'ng giatake si Konsehal Maryann Delos Santos sa mga dumadapig sa Team Rama tungod sa iyang pagtapon sa Bando Osmeña Pundok-Kauswagan.
Para kanako, dili angay'ng masuko ang Team Rama kun si Maryann mitapon sa BOPK. Sama nga ang taga BOPK wala man magyawyaw ug wala masuko diha nga adunay ilang mga konsehal nga mibiya ug mitapon sa Team Rama.
Gani kon magtan-aw ko pag-ayo sa sitwasyon, mapahiyumon man si Konsehal Margot Osmeña nga makigsultihanay sa mga kanhi niya kauban sa BOPK bisan og alyado na kini sa Team Rama.
Nasayod hinuon ko nga sagad sa init kaayo niining maong isyu nga pagtapon sa mga konsehal ngadto sa laing politikanhong pundok, mao ra g'yud ang mga dumadapig.
Ang akong tambag kaninyo nga ayaw palabi sa inyong gibati. Sa politika, kauban nimo ang politiko karon apan inigka ugma, mahimo nga imo na siya nga kaatbang.
Tan-awa ra gud ang nahitabo nila ni Tommy Osmeña ug Mike Rama, kauban sila sa BOPK kaniadto, apan karon higpit na nga kaaway. Si Mike kaniadto, tak-um kaayo og baba nga dili g'yud mosaway kon adunay wala niya magustohi.
Bisan kadtong mga konsehal nga mitapon sa Team Rama gikan sa BOPK, ang uban kanila puwerte na nga makapanaway, apan kaniadto nagpakahilom lang.
Mao na'y wala'y ayo. Ang nindot mao nga bisan og kauban pa kamo og grupo unya adunay mga wala ninyo magustohi, ipadayag ang inyong baruganan, dili kay tak-um lang apan unya ra magyawyaw.
***
Nakadungog ko nga aduna pa'y laing mga konsehal sa dakbayan sa Sugbo nga motapon sa laing grupo. Dili lang ko mobutyag kon sakop ba siya sa BOPK o kaha Team Rama.
Basta kay kining mao nga konsehal, wala na kaayo makasabot sa iyang kahimtang sa iya karon nga grupo. Kaila mo'g kinsa?