Palabwanay sa tabo
Malipayong gipahibawo ni kanhi mayor Tommy Osmeña nga, inay Sabado ug Dominggo lang, kada adlaw na ang tabo sa mga mag-uuma duol sa South Road Properties. Di hinuon sama kadaghan ang baligya sa weekdays kay mag-agad sa gidaghanon sa mamalitay. Nanghinaot siyang inanay nga matubag ang nag-usbaw nga demanda sa lab-as ug baratong mga utanon dinhi sa patag.
Sugod sab gahapong adlawa gihawanan ang dugang luna alang sa mga sakyanan. Tubag na nila sa pagdili na sa Cebu City Transportation Office, ang kanhi CITOM, sa parking sa dan atubangan sa pribadong luna nga nahimutangan sa tabo. Matod ni Osmeña mas luwas ang mga sakyanan sa sud.
* * *
Gipanghimakak ni Cebu City Mayor Mike Rama nga pagpanghasi ang pagbutang og "No Parking" signs sa atubangan sa tabo nga gipasiugdahan ni Osmeña. Iyang gipasa sa kadagkoan sa CTTO ang responsibilidad sa pagdili sa parking. Nga iya sang gipanalipdan nga kabahin sa pangandam sa paghuot sa trapiko sa pag-abli na sa SM Seaside City pila ka buwan gikan karon.
Apan gitataw ni Osmeña nga andam silang mo-alkontra sa bisan unsang maniobra ni Rama. Subli niyang gipasabot nga di angay nga mahulga si Rama sa pagdako sa tabo nga gusto lang niyang pamatud-an nga mahimong mapadako ang kita sa mga mag-uuma ug sa samang higayon maka-barato ang mga konsumidor.
* * *
Wa makig-ribal si Rama sa tabo ni Osmeña sa pagpahigayon sa tabo sa Plaza Sugbu sa tugkaran sa City Hall matag Biyernes sugod sa niaging semana. Matod ni Rama igo lang niyang gipatuman ang ordinansa nga nagmando pagpahigayon sa tabo. Wa na maghisgot ang mayor kon kolektahan ba og arkabala ang moapil nga mga mag-uuma.
Sa iyang bahin, si Cebu City Councilor Margot Osmeña nakabati nga hagbay ra untang ipatuman ni City Agriculturist Joelito Baclayon ang ordinansa sa tabo apan gisupak ni Rama kay di siya ganahan nga mahugaw ang Plaza. Nangagpas si Osmeña nga nausab ang hunahuna ni Rama tungod sa kalamposan sa tabo duol sa SRP.
* * *
Nikumpisal si Konsehal Osmeña nga dugay nang damgo sa iyang bana ang pagpasiugda og tabo sa mga mag-uuma. Pagkahuman sa binilyon ka pesos nga SRP, nangandoy ang kanhi mayor og mga proyekto sa labing gagmay nga mga sakop sa katilingban.
Nakabuylo ang plano pagka-kongresista kay mas daghan nang libre nga panahon. Nakaduaw na sa malambuong mga umahan sa Quezon. Sa sinugdanan gipakaingon nakong nanungog ra siya ni Rama. Pagduaw niya sa DYAB gahapon naklaro nako nga tinuoray ang iyang kahinangop sa paglambo sa tabo. Nga may tambag pa gani sa mga mag-uuma aron di mabun-og ug malawos ang mga utanon sa sakyanan gikan sa bukid - ibutang og styrofoam nga may ice water.
* * *
- Latest
