Di na bag-o ang tabo paghatag og higayon sa mga mag-uuma sa bukirang mga barangay sa direkta nga pagbaligya sa ilang mga abot ngadto sa mga konsumidor sa patag. Ang tumong mao ang pagpaubos sa presyo alang sa mga konsumidor ug pagpalambo sa kita sa mga mag-uuma pinaagi sa paglaktaw sa mapahimuslanon nga mga negosyante.
Apan lahi ug malampuson gyod tingali ang tabo sa mga mag-uuma sa South Road Properties nga gipasiugdahan ni kanhi Cebu City Mayor Tommy Osmeña. Kay nadapit mang pagtagad ni Mayor Mike Rama. O tingali higpit lang gyod ang ilang panagribal nga wa nay palabyon nga bisan unsang lakang sa usag-usa.
* * *
Niinsistir si Rama nga angayng mananghid si Osmeña ug ang mga mag-uuma sa City Hall sa di pa sila mamaligya og bisan unsa ngadto sa publiko. Nipasabot sab si Market Administrator Racquel Arce nga kinahanglang mobayad og arkabala ang mga mag-uuma ug kinahanglang susihon sa City Hall di ba makadaot sa kahimsog sa publiko ang ilang mga utanon.
Apan nitataw si Osmeña nga di makapanghilabot ang City Hall nila kay pribadong luna ang ilang gibaligyaan. Matod niya makakolekta lang si Arce og arkabala kon nigamit pang mga mag-uuma sa sidewalk ug kadalanan sa dakbayan. Gipasidan-an niya si Arce nga sila ang mag-away kon gamitan niya og puwersa ang mga mag-uuma.
* * *
Sa iyang pagduaw sa Arangkada sa DYAB Abante Pa, Bisaya! sa niaging buwan unang gipahibawo ni Osmeña ang iyang plano sa pagtabang pagpaubos sa presyo sa mga utanon ug pagpadako sa kita sa mga mag-uuma.
Wa siyay tinguha pagpatay sa Carbon ug ubang kamerkadohan. Ni sa pagputol sa panginabuhi sa mga komprador. Ganahan lang siya nga mahunong ang pagpaburot sa ilang ginansiya nga nakapaalkanse di lang sa mga mag-uuma kon di hasta na sa mga konsumidor.
Matod ni Osmeña gusto lang siyang matapakan ang dakong buslot sa sistema sa binaligyaay sa Sugbo ug sa nasud.
* * *
Kon magmalampuson ang tabo sa mga mag-uuma sa SRP, nga gisalmotan di lang sa mga mag-uuma sa Sugbo kon dili hasta na sa kasilinganan nga mga lalawigan sa Kabisay-an ug Mindanao, gipahibawo nang daan ni Osmeña nga palapdan pa nila ang binaligyaay.
Labaw sa paghatag og luna nga magkatagbo ang mga konsumidor ug mga mag-uuma mao ang paghatag nila og kasayuran. Matod ni Osmeña tukmang kasayuran sa presyo ug suplay sa mga utanon ug ubang produkto ang labing epektibong panagang batok sa mga maniobra: Kon mahibawo ang mga mag-uuma pila ang aktuwal nga presyo sa kamerkadohan, di sila mailad sa mga komprador; samtang kon mahibawo ang mga konsumidor sa presyo sa pagbaligya sa mga mag-uuma, madasig sila sa pagpangita og mas makiangayon nga mga palitanan.