Nameligro ang kalinaw

Sa gipahibawong daan ni Presidente Noynoy Aquino nga kataposan na niyang mensahe mahitungod sa engkuwentro sa Mamasapano, Maguindanao, nisubli siya pag-angkon og responsibilidad nga iya nang gihimo sa ikaduha niyang mensahe sa nasudnong telebisyon mahitungod sa trahedya aron lang bakwion sa nisunod niyang pakigpung atubangan sa mga lider sa nagkalainlaing relihiyon sa tugkaran sa Malakanyang.

Apan bisan sa sukwahi nga mga awhag, si Aquino pabilin nga:

• Nagdumili pagpangayo og pasaylo;

• Nagdumili pag-angkon nga sayop ang iyang pagtugot sa suspendidong hepe sa Philippine National Police  nga si Direktor Heneral Alan Purisima sa pagduma sa Oplan Exodus; ug

• Nagdumili pagsaway sa Moro Islamic Liberation Front  bisan sa mga ebidensiyang gitiwasan pagpatay ug gipanamastamasan ang mga patayng lawas sa mga sakop sa Special Action Force.

* * *

Bugtong bag-ong linya nga giluwatan ni Aquino sa iyang pakigpung  gahapon atubangan sa mga gradwado sa PNP Academy mao ang iyang pagpangayo sa pagsabot sa katawhan. Nga gisandig niya og duha ka sukaranan:

• Kon nahibawo pa lang siya nga mora diayng suicide mission ang gisangon sa SAF commandos sa Mamasapano, sukwahi sa tanang pasalig ni Direktor Getulio Napeñas, ang girelibohang hepe sa SAF, wa unta niya tuguti ang operasyon; ug

• Kon nakadawat pa dayon siya og tukmang kasayuran sa kaapiki sa kahimtang sa SAF commandos sa sayong buntag pa lang sa Enero 25, gimando unta dayon niyang paghimo sa tanang paagi paghunong sa pinusilay ug pagluwas nila.

* * *

Way garantiya nga ang pakigpung ni Aquino makapatak-op na sa kontrobersiya. Di buhian sa iyang politikanhong mga kaatbang kining bulilyaso nga labing nakatay-og sa iyang pamunoan. Ang gitakdang pagpadayon sa buwag nga mga imbestigasyon sa Senado ug sa House of Representatives liwas sa Semana Santa segurong makapalugway pa sa lalis.

Mahimong may motumaw pang bag-ong kasayuran labot sa engkuwentro sa mosunod nga mga adlaw. Mahimo ganing makakita na sab si Aquino og laing panginahanglan sa pagluwat og dugang mga pamahayag.

* * *

Human niangkon og responsibilidad ug bisan nagdumili pagpangayo og pasaylo sa Mamasapano, di mapugos si Aquino sa pag-resign ug tungod sa iyang popularidad ngadto sa katawhan ug lig-ong liderato sa militar ug kapolisan di siya mapalagpot sa katungdanan, samang wa say bisan unsang pagsuwat sa kudeta nga mosalir.

Apan labing nameligro mao ang Bangsamoro Basic Law.   Nga mahimong di mapasar sa gipasalig sa liderato sa Kongreso karong Hunyo. Ni hangtod sa pagkapupos sa termino ni Aquino sa 2016. Di katabang ang pagdupa dayon ni Aquino sa MILF ug ang pagtiwas og panulisok sa MILF sa napatay nilang SAF commandos. Pagka-anugon. Kon di makab-ot ang malungtarong kalinaw sa Mindanao karon, wa nay makaseguro kanus-a pa moabot ang sunod nga kahigayonan.