Nakadawat ko og report nga misiaw na man diay ang mga illegal suwertres dinhi sa dakbayan sa Sugbo. Sigun sa inpormasyon nga akong nadawat nga mikatap na kini sa lainlaing kabarangayan.
Gikan ko sa dakbayan sa Davao kaniadto'ng miagi'ng semana ug adunay nakatug-an kanako nga ang tawo nga nag-operate sa illegal suwertres dinhi sa Sugbo taga Davao del Sur.
Mao diay nga pipila ka buwan ang milabay, adunay mireport kanako nga nakabantay siya og illegal suwertres operation nga may ticket booth g'yud diha sa Barangay Pahina San Nicolas, duol ra kaayo sa barangay hall.
Ang usa ka announcer sa sibyaanan DYLA nagsige 'sab og yawyaw kabahin sa gituohan niini illegal suwertres diha sa Arellano Boulevard nga sakop sa Barangay San Roque.
Kini maoy nakapatuo kanako nga may operation g'yud sa illegal suwertres dinhi sa dakbayan sa Sugbo nga gibunyagan og Oplan Mercury.
Ang akong informer mitug-an nga ang tigpasiugda sa illegal suwertres miduol og dako'ng opisyal sa City Hall aron tugotan sila nga maka-operate nga walay mosupak, apan sila gibalibaran.
Apan pipila kuno ka opisyal ang midupa aron kini'ng mao nga operation sa illegal suwertres makapahigayon. Ang akong informer mitug-an nga pipila ka opisyal sa kapolisan nagproteher usab niini nga kalihukan.
Hagiton nato ang mga polis dinhi sa dakbayan sa paglutos niini'ng mao nga illegal suwertres nga dili kabahin sa operation sa Philippine Amusement and Gaming Corporation (Pagcor).
Ayaw ninyo huwata nga ang mga sakop pa g'yud sa Police Regional Office-7 ang molihok niini.
Didto ko sa Dakbayan sa Davao kay gibisitahan nako ang akong igsuon nga na-ospital. Nalipay ko nga nakaadto kay nasayran nako ang mga maayo'ng serbisyo sa kagamhanan sa Davao City nga angay'ng sundon dinhi sa dakbayan.
Pagsakay nako og taxi gikan sa Davao City airport paingon sa Southern Philippines Medical Center, nasayran nako gikan sa drayber sa taxi nga akong gisakyan nga dili diay basta-basta nga ang usa ka tawo makapanigarilyo sa ilang siyudad.
Istrikto kaayo ang ilang balaud ug dakpon g'yud sa mga polis ug tanod ang mga malapason sa gilatid nga ordinansa sa dakbayan.
Gidid-an usab ang mga drayber pagpakusog pagpadagan sa ilang mga sakyanan lapas sa 30 kilometros ang matag takna. Hitsas ang mga traffic enforcers ug speed gun nga mosukod sa gikusgon sa dagan sa sakyanan.
Apan ang labi g'yud nga nindot nga serbisyo sa Davao City government nga nakadayeg ko pag-ayo mao ang paghatag nila og tukma nga pangalagad sa mga kabus nga pasyente.
Dinhi sa dakbayan sa Sugbo, adunay gitawag og City Medical and Hospitalization Program (CMAP) nga motabang sa mga kabus sama sa paghatag og mga tambal ug pagpa-ospital.
Sa Davao duna 'sab sila'y gitawag og Lingap Center, apan mas epektibo ang ilang pagtabang ug dalay'gon ang mga opisyal nga nagdumala.
Tiaw mo nga 24 oras nga adunay mga kawani nga moabi-abi niadto'ng mga nanginahanglan og tabang? Wala gayud kini himoa dinhi sa dakbayan sa Sugbo. Ang serbisyo dinhi kutob ra sa alas singko sa hapon. Sa Davao City dunay mga kawani nga gitahasan nga moserbisyo sa tanang oras.
Mapahiyumon pa gayud ang mga sakop sa Lingap Center ubos nila ni Ma'am Henrita "Nanette" Macapundag ug ni Sir Roldan "Pastor Lingap" Olave.
Mapahiyumon pa sila nga moabi-abi sa mga pasyente nga manginahanglan sa ilang tabang. Tungod diay kini kang Mayor Rodrigo Duterte nga mibaud gayud sa mga kawani nga ayuhon sa pagserbisyo ang manginahanglan.
Misuway ko pag-interview sa mga pasyente nga nanginahanglan og tabang, sila'ng tanan midayeg gayud kang Mayor Duterte. Mao diay nga dili g'yud mapilde si Duterte kun molansar.
Dili ba maayo nga himuon usab kini dinhi sa dakbayan sa Sugbo? Kun ako pa ang mayor sa Sugbo, sundon nako ang dalaygon nga buhat ni Duterte nga nagpakabana gayud sa mga kabus.
Ang dakbayan sa Davao adunay 186 ka barangay nga subra pa bisan og doblehon ang kabarangayan dinhi sa dakbayan, apan naalagaran gayud nila ang ilang mga lumolupyo.
Dili ba maayo nga ato kini'ng sundon?