Desperado pagbalik sa gahom

May sukaranan ang mga pagsaway sa pagduma ni Presidente Noynoy Aquino sa operasyon pagkuha sa gikaintapang mga terorista sa Mamasapano, Maguindanao ug sa niulbo nga krisis human sa pagkamatay sa 44 ka sakop sa Special Action Forces. Apan dihang nikabayo ang mga alyado ni kanhi presidente Gloria Arroyo ug sa ubang mga kaatbang sa pamunoan nabantang sa katawhan nga mas dako ang kaguliyang kon molampos ang kampanya pagpalayas ni Aquino sa katungdanan.

Si Arroyo maoy labing sayop nga mangahas pagtay-og sa gobyerno. Bugtong himuon sa katawhan mao rang paglingi sa mas dagko niyang eskandalo ug mabugnaw na pagpaluyo sa politikanhong mga maniobra.

* * *

Ambot unsay nasud sa panghunahuna nilang kanhi defense secretary Norberto Gonzales, kanhi senador Kit Tatad ug ubang kadagkoan sa National Transformation Council. Gawas nga wa managana nga nagpabantang pagpangu sa kampanya bahala nang dudahan nga igo lang nagtuman sa sugo sa napriso nilang agawon, sila pa gyoy nitanyag sa ilang kaugalingon nga maoy mopuli pagduma sa nasud.

Di sila kadudahan nga mga konsabo ni Bise Presidente Jejomar Binay kay giawhag man nilang mo-resign ang tibuok gobyerno. Apan maglisod sab sila pagpasabot diin gikan ang ilang mandato sa pagpapahawa nilang Aquino ug kaubanan nga nakaangkon sa makabungog nga kadaogan sa piniliay nga napahigayon atol pa sa pamunoan ni Arroyo niadtong 2010.

* * *

Ang kabakikaw sa demanda sa NTC way kalainan nga si Cebu City Vice Mayor Edgar Labella ang nangunay pag-awhag sa resignasyon ni Mayor Mike Rama ug sa pagtanyag sa iyang kaugalingon nga maoy mopuli pagduma sa City Hall, o si Cebu Vice Governor Agnes Magpale ang labing agresibong mopalayas ni Gobernador Junjun Davide aron nga siya ang mobanos sa Kapitolyo.

Nagmatuod lang ni sa ka-desperado sa kampo ni Arroyo. Di silang katugot nga makatiwas si Aquino sa iyang termino kay nabalakang mas makabuylo ang kampanya batok sa pangurakot. Maong gigamit bisan ang mga haligi sa relihiyon ug giinitan bisan ang kanihit og buhok sa presidente aron lang makabalik sila sa gahom.

* * *

Ang pagpabilin sa suporta sa publiko sa iyang pamunoan di hinuon angay nga makadasig ni Aquino sa pagsalikway sa panginahanglan sa pag-angkon og hingpit nga responsibilidad sa trahedya sa Mamasapano ug pagpangayo og pasaylo sa nagbangotan nga mga pamilya sa napukan nga mga bayani.

Di siya angay nga maminaw sa pasidaan sa iyang mga magtatambag nga mahuyang ang iyang pamunoan kon moangkon sa kasaypanan sa operasyon kay makakita og dugang sukaranan ang iyang mga kaatbang paggukod niya. Angay siyang makaamgo nga mas molig-on ang iyang liderato kon moangkon og responsibilidad di sa pung lamang, kon dili sa aktuwal nga paghingusog sa kampanya batok sa terorismo ug pagpalambo sa kalinaw sa Mindanao.

[email protected]