Utok sa Oplan Wolverine
Human nitingog silang Presidente Noynoy Aquino ug Director Getulio Napeñas, ang gitangtang nga hepe sa Special Action Force sa Philippine National Police, nadungangan ang atong nahibaw-an sa duguong engkuwentro sa mga sakop sa SAF, Moro Islamic Liberation Front ug Bangsamoro Islamic Freedom Fighters sa Barangay Tukanalipao sa lungsod sa Mamasapano sa Maguindanao.
Aron pagkuha og mas klarong hulagway unsa gyoy tinuod nga nahitabo atubangan sa pagsibaw sa bisan unsang kasayuran gikan sa bisan asang tinubdan, salamat sa kakuwang sa opisyal nga kasayuran, gisumpay nako ang nagkatakdo nilang asoy ug gisuwayan paghusay ang nagkasungi nilang mga detalye.
* * *
Apan unahon nato pagtuki ang kasayuran gikan sa "kasaligang mga tinubdan" nga nagtumbok ni Director General Alan Purisima, ang suspendidong hepe sa PNP, nga maoy niumol sa Oplan Wolverine niadtong 2011. Pinasikad sa kasayuran niadtong 2010 nga ang Malaysian nga siZulkifli bin Hir, alyas Marwan, gipasanginlang tighimo og bomba sa Jemaah Islamiyah, nga alyado sa Al Qaeda ni Osama bin Ladin, nagtago sa Tukanalipao, pinuy-anan sa iyang pangabaga nga si Abdul Bassit Usman.
May gamay hinuong buslot ang pasangil: Disyembre 2012 nang niasumir si Purisima isip hepe sa PNP. Gisundan niyang unang duha ka hepe nga gitudlo ni Presidente Aquino nga posibleng maoy unang napasahan sa kasayuran, silang Raul Bacalzo ug Nicanor Bartolome.
* * *
May pasangil sab nga gilaktawan ni Purisima si DILG Secretary Mar Roxas tungod sa ilang away, si Roxas maoy gipasanginlan ni Purisima nga utok sa iyang pagka suspenso sugod sa niaging buwan. Gipasanginlan si Purisima nga nidiretso pagsumiter sa plano ngadto ni Executive Secretary Jojo Ochoa, ang pangu sa Presidential Anti-Crime Commission niadtong 2011.
Apan gawas nga di pa hepe sa PNP si Purisima niadtong higayona, si anhing Jesse Robredo pa ang kalihim sa DILG, hangtod sa paghagsa sa iyang ayroplano sa kadagatan sa Masbate niadtong Agosto 18, 2012. Magbantay ta. Tingali paglubog di pagtin-aw ang tuyo sa nagbaha nga kasayuran.
* * *
Matod ni Aquino gisugo niya si Napeñas pakiglambigit sa militar sa di pa ilusad ang operasyon. Si Napeñas nikumpisal nga wa niya pahibaw-a ang militar, ang MILF ug ubang PNP units aron pagpreserbar sa sekreto ug wa siya mananghid ni PNP Chief Leonardo Espina, kinsa igo lang niyang gi-text dihang nakabuylo nang operasyon.
Nipuno si Napeñas nga wa niya pahibaw-a si Roxas apan nitug-an si Aquino nga na-istoryahan niya si Roxas sa plano. Gitataw ni Aquino nga ang pagduma ni Purisima sa operasyon naputol dihang gisuspenso siya niadtong Disyembre. Niinsistir sab nga wa kinahanglana ang iyang pagtugot sa aktuwal nga paglusad sa operasyon. Si Napeñas ba gyoy tinuod nga hawod sa Oplano Wolverine? O siya na lay gipa-um-om sa tanang bulilyaso?
- Latest
