Nakalingkawas ni Amang

Tanang timaan nagpakita nga makaikyas ang dakong bahin sa Sugbo sa labing bangis nga santako sa bagyong Amang. Sa iyang pagsud sa Philippine Area of Responsibility gahapon sa kadlawon, natungod na sa Guiuan, Eastern Samar, ibabaw sa Dakbayan sa Sugbo kansang kasaulogan sa Piyesta Senyor makapadayon uban ang gamayng kahasol sa uwan ug hinayng huros sa hangin.

Nipasidaan hinuon si PAGASA Visayas Director Oscar Tabada nga di angayng mokumpiyansa ang mga Sugbuanon. Kay maapil gihapon ang dakbayan sa mga dapit nga bas-on ni Amang. Samtang di sama kadaghan sa uwan nga gihuwad ni Seniang, angay gihapong pangandaman ang uwan ni Amang nga moabot og 100,000 ka baril matag oras.

*  *  *

Magpadayon ang maayong panahon sa Sugbo hangtod ugma, Biyernes. Mag-uwan karong Sabado, bisperas sa Piyesta Senyor, apan hinay ra. Mas seryusong tinubdan sa kabalaka, labi na sa fluvial procession sa imahen ni Sr. Sto. Niño, ang kusog nga huros sa hangin, 20 ngadto sa 35 ka kilometro matag oras, nga mahimong makapadagko sa bawod.

Apan hinay ra kon itandi sa 65 ka kilometro matag oras nga kinakusgang hangin ni Amang ug pag-unos nga hangtod sa 80 ka kilometro matag oras. Gawas pa, way giluwatan nga public storm warning signal ang PAGASA ug busa mahimong tugotan sa Philippine Coastguard ang tinuig nga prosesyon sa dagat.

*  *  *

Ang orihinal nga forecast sa PAGASA gahapon sa kadlawon nitakda nga makabiya na sa Kabisay-an ug mopaduol sa Bicol si Amang inig duaw ni Pope Francis sa Tacloban City ug Palo sa Leyte karong Sabado. Apan human sa pila ka oras, gikurhian ni Tabada.

Nipasabot si Tabada nga ang bugnawng hangin gikan sa China maoy nibabag sa agianan ni Amang paibabaw ngadto sa Legazpi City ug dayon sa Infanta, Quezon. Nabalaka si Tabada nga gawas nga magpabilin si Amang sa silangang Kabisay-an hangtod sa pag-abot sa Santo Papa mahimo pang motugpa sa yuta sa Northern Samar.

*  *  *

Nikumpisal si Tabada nga mas sayon unta ang pagsubay sa dagan sa bagyong Amang kon wa pa madaot ang ilang doppler radar sa Guiuan nga naguba sa pagkusukuso sa bagyong Yolanda niadtong 2013. Karong buwana sugdan og ayo sa mga eksperto gikan sa Japan ug gitakdang mahuman unya pa sa Disyembre.

Makatabang hinuon ang gibutang sa PAGASA nga mobile doppler radar sa Tacloban, bisan kon hangtod sa 100 ra ka kilometro ang makit-an (kon itandi sa hangtod 400 ka kilometro nga makit-an sa doppler radar sa Mactan). Nipasalig si Tabada nga inig sikit nang Amang sa Kabisay-an karong adlawa, Biyernes, moluwat sila og weather bulletins matag oras. Aron mahibawo ang katawhan sa nahimutangan sa bagyo ug sa bisan unsang kausaban nga direksiyon o gikusgon ini.